Armed Veng ‘S’ in semi-final an lut

May 26, Thawhtanni khan LBS Suzuki 22nd Inter Branch YMA Football 2025 khelh chhunzawm a ni a, RG Stadium-ah quarter-final match hnih khelh a ni. Inkhel hmasa zawkah Armed Veng South in 4-0 a Kawnpui Venglai sawpin semi-final an lut a. Inkhel hmuhnawm takah Bethlehem Vengthlang chuan 2-1 a Bawngkawn hnehin semi-final an lut ve bawk.
Lungdai lakah vaneihthlak taka dam khawchhuak hram Armed Veng South hian Kawnpui Vengthar an ngam hle a, a khat mawi takin goal an thun a ni ber mai. Champion tura rinkai zinga mi Armed Veng South tan hian J Lalbiakliana chuan minute 36-naah hmahruaina goal a thun a. Goal hmahruai thuntu Biakliana hian minute 40-na lekah an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal pawh a luh belh thei lawk lo. Hun rei tak chhung goal a luh belh theih loh hnuin Armed Veng South in a tawp an khar tha a, hun tawp dawn hnaiah goal hnih an thun belh zui leh. Aizawl chhuah lam Veng tan hian Lalnunsanga chuan minute 80-naah an goal thumna thunin an hmahruaina a tizau a. Lalfamkima chuan minute 89-naah an goal lina thunin a tawp a khar a, Kawnpui Vengthar lakah 4-0 ngawta hnehna changin semi-final an lut. Semi-final ah an Veng thenawm Bethehem Vengthlan an hmachhawn zui leh ang.
Quarter-final hmasa berah Armed Veng South an chak hnuin quarter-final match hnihnaah Bethlehem Vengthlan leh Bawngkawn te intumin, inkhel hmuhnawm an lantir zui ve leh. Inkhel hmuhnawh takah hian Bethlehem Vengthlangin 2-1 in hnehna an chang a, semi-final an lut zui ve leh bawk.
Bethlehem Vengthlang hian Bawngkawn lakah bul an tan tha lova, goal chhuah hmasa zawkah an tang. Bawngkawn tan hian Vanlalawmpuia chuan minute 12-na lekah hmahruaina goal a thun. Bawngkawn in goal an thun hmasa hi inkhel tihmuhnawm zualtu a ni a, Bethlehem Vengthlangin an si phurh sut tuma an khingpuite an nawr let a hmuhnawm thei hle. Goal thun ngei tuma tan khawh Bethlehem Vengthlang tan hian PC Laldinpuia chuan minute 34-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Bethlehem Vengthlangin bul an tan tha ve thung a, Emmanuel Lalhruaizela chuan minute 56-naah hma an hruai letna goal a thun. Bawngkawn in an si phurh sut tum viau mah se hun tawp thlengin goal an thun thei tawh lova, inkhel hmuhnawm takah Bethlehem Vengthlangin hnehna an chang a, semi-final an inhlangkai.
Quarter-final hi vawiinah khelh zawh a ni dawn a, RG Stadium-a inkhel hmasa zawkah Dutlang leh Kawnpui Vengthar an inhmachhawn ang a. Quarter-final hnuhnung berah Republic leh Sialhawk an inhmachhawn zui ve leh ang.