Arsenal an zuih

Hmanni lawkah kha chuan Arsenal chu trophy lian pali la thei dinhmunah an ding a. FA Cup quarter-final-ah an Southampton hneh lova an tlak leh tak vangin Arsenal hi an zuih ta hle a. An tih fuh berah pawh trophy pahnih bak an la thei tawh lova. An tihsual phei chuan trophy lova season khar thei dinhmunah an ding leh der tawh.
EPL hmahruaitu Arsenal hi Championship club Soutampton hmachhawn turin St Marry’s Stadium-ah an leng lut. Championship club lakah chak tura rinkai zawk ni bawk mah se manager Mikel Arteta chuan player naupang zawk leh khel tlem zawkte chhawr nan a hmang. An regular player te a awltir hi a tisualah a ngaih theih zui ta a, trophy pakhat an hloh leh phah ch a ni leh ta reng mai.
Southampton hian an mikhual Arsenal lakah bul an tan tha a, Ross Stewart chuan minute 35-naah hmahruaina goal a thun. He goal hmang hian hun rei tak chhung hma an hruai nghe nghe. Hnufaual zawk an nih reng hnuin Arsenal tan bench atanga lut Viktor Gyokeres chuan minute 68-naah goal thunin an si phurh sut.
1-1 a nih hnuin inkhel a hmuhnawm thar leh a, chak tumin an innawr tawn nasa hle. Inkhel hmuhnawm takah hian Saints an chefuh nawn leh a, hun tawp dawn hnaih minute 85-naah Shea Charles chuan hma an hruai nawn lehna goal a thun a, Gunners an barakaih nawn leh. Charles goal thun hi Arsenal in an sut thei tawh lova, FA Cup semi-final lut zo lovin an tla zui ta a ni.
Trophy lak chaka tuihal Arsenal hian EPL leh Champions Legue-ah champion tumin tan an khawh zui leh dawn a. Zuih tawh lovain trophy pahnih tal lak hi an mamawh tak zet a ni.