Arsenal 1-1 City

Pathianni zana English Premier League 2025-26 khelh chhunzawm a ni a, inkhel hmuhnawm takah Arsenal leh an mikhual Manchester City te an inhnehtawk. An muala Arsenal tlawm mai tur chu bench atanga lut Gabriel Martinelli chuan goal ropui thunin a chhanhim. An mualah tlawm an pumpelh vanngin Arsenal in pahnihna an luah chhunzawm.
Emirates Stadium-a lenglut Manchester City in bul an tan tha viau a, goal pawh an thun hma hle. Pep Guardiola team enkawl City hian fuh zetin an khingpuite an nawr let thut a, Bernardo Silvva ball pek fing tak atangin Erling Haaland chuan inkhel tan atanga minute 9-na lekah si nghak David Raya dan rual lohin lei hrulah a pet goal a, hmahruaina goal a thun.
Goal thun hmasa zawkah an tan vangin City in an goal venhim tumin thapui an thawh zui a, conter attack-ah an inghat zui nghal. Arsenal in an si phurh sut ngei tumin thapui an thawh a, ball an chang tam fal hle a, an mikhualte an nawr ber tlat. Ball chang tam viau mah se an goal venhim tuma tan khawh nasa tak City an paltlang hlei thei lova, goal thun theihna hun tha an insiamchhuah hleithei meuh lo.
Inkhel hmuhnawm takah goal a luh belh thei lo reng a, goal thun tuma Arsenal tan khawh a hmuhnawm thei hle. Gunners manager Mikel Arteta chuan chawlhlawk hnu lamah an player pawimawh Saka leh Eze te a luhtir. Saka a luh hnuin City an bet leh zual. City manager Pep Guardiola-an Arsenal hneh ngei tumin tan a khawh a, an forward player la chhuakin defender a hnawh lut. Arsenal manager Mikel Arteta-a’n goal thun a duh vangin an defender thenkhat a lachhuak a, forward leh an khingpuite nawr na thei tur a dah lut ve thung. Arteta hi hun tawp dawn hnaihah de fuh zawkah a tang a, an si phurh an sut ta nge nge.
Arsenal tan hian bench atanga lut Gabriel Martinelli chuan hun pek belh minute 90+3-ah fuh zetin City si nghak ianluigi Donnarumma a pet khum a, an si phurh a sut. Martinelli hian bench atanga lutin Athletic Club lakah Gunners hi a lo chakpui tawh a. EPL-ah City laka an tlawm tur a chhanhim zui leh bawk. Arsenal in an si phurh an sut hnuin team lian pahnihte an innawr tawn nasa hle. Inkhel hmuhnawm takah goal dang a luh belh thei tawh lova, Arsenal leh an mikhual Manchester City te 1-1 in an inhnehtawk.
An mualah tlawm an pumpelh vangin Arsenal in khelh nga atanga point 10 hmuin pahnihna an luah chhunzawm. Hetihlai hian Manchester City erawh chuan khelh nga atangin point 7 chauh an la hmu thung a, kum 2006-07 hnu lamah EPL-a bul an tan chhiat ber tum an tawng mek. City hian an elpui lian Arsenal hi tunhnaiah an hneh hleithei lova, Gunner lakah vawi nga ngawt an chak thei lo zawn tawh. Pep Guardiola-an league-a a ngam loh ber chu Arsenal hi an ni mek. Arsenal lakah insiamthat thuai an mamawh hle a ni.