Arsenal an chak awlsam

EPL-ah champion tuma tan khawh Arsenal an khel tha chho leh tan. Gunners hian inrinni zan London derby-ah mualneitu West Ham United chu 5-2 ngawtin an hneh. West Ham lakah an chak leh tak vangin Arsenal hian Manchester City an lehpel lailawk a, pahnihnaah an inhlangkai. Arsenal rual hian season thara khel tha Nottingham Forrest in hnehna an chang ve bawk.
Arsenal hi season kal meka khel tha lo West Ham United hmachhawn turin London Stadium-ah an leng lut. An lenluhna mualah an khel tha viau a, chawlhlawk hmain goal nga ngawt an thun hman. Mualneitu West Ham pawhin chawlhlawk hmain goal hnih an thun ve bawk a, chawlhlawk hmain goal 7 ngawt a lut hman. Hei hi EPL-ah chawlhlawk hmaa goal sarih a luh vawi khatna a ni nghe nghe.
Manchester City leh pel tura chak mamawh Arsenal tan hian defender Gabriel Magalhães chuan minute 10-na lekah Saka corner pet a tauh goal a, hmahruaina goal a thun. Hma takah goal an thun vangin Arsenal an phur a, goal an thun belh leh thuai. Minute 27-naah Leandro Trossard chuan an goal hnihna a thun. Minute 34-naah captain Martin Ødegaard-a’n an goal thumna a thun hnuin minute 36-naah Kai Havertz chuan an goal lina a thun zui leh zat bawk.
An mualah goal li ngawt an chhuah zawn hnuin Hammers an insiamtha a, goal hnih an thun zawn. Aaron Wan-Bissaka chuan minute 38-naah goal thunin an si phurh a sut then. Bissaka goal thun atanga minute hnih hnu lekah Emerson chuan an goal hnihna a thun zui leh zat bawk. Goal hnih an thun zawn vangin phur viau mah se Hammers an phur rei lo. Minute 45=5-ah Bukayo Saka chuan penalty atangi an goal ngana a thun a, 5-2 a hmahruai chungin chawlhlawk an hmang.
Chawlhlawk hmain goal sarih ngawt lut mah se chawlhlawk hnu lamah goal a luh belh thei tawh tlat lo thung. Team hnihte hi goal thun tumin innawr tawn nasa viau mah se hun tawp thlengin an hlawhtling zo tawh lova, Arsenal chuan 5-2 a hnehna changin point thum an hmu. West Ham laka point thum an hmuh hmangin Gunners hian Manchester City an leh Brighton an lehpel lailawk a, pahnihnaah an inhlangkai. Gunners in pahnihna an luah lai hian West Ham United erawh chuan khelh 13 atanga point 15 hmuin 14-na an luah ve thung.
Irinni zana inkhel dangah season thara khel tha tak Nottingham Forrest chuan Chris Wood penalty pet goal hmangin anmikhual Ipswich Town chu si khat faiin an hneh. An mualah an chak vangin Nottingham Forrest hian khelh 13 atangin point 22 an hmu tling chiah a, paruknaah an inhlangkai.