Arsenal an chak zo lo

Ningani zan khan English Premier League (EPL) 2025-26 khelh chhunzawm a ni a. Table-a hmahruai mektu Arsenal chuan Brentford mualah hnehna an chang zo lova, champion tuma inelna boruak a nung thar leh zual. Arsenal chelhtu Brentford hian champions league khelh phak beiseina sang zawk an nei thar ve thung.
Nilai zanah pahnihnaa awm mek Manchester City leh pathumna luah mektu Aston Villa ten hnehna changin point thum an hmu. City leh Villa chak hian Arsenal tan pressure na zawk a siamsak. Gunners hi chak mamawh tak chungin Brentford mual Gtech Community Stadium-ah an lenglut. Chak an mamawhna inkhelah beisei an phak lo leh tlat a, an hri vei an vei chhunzawm a, an mutan an thingthla tak tak thei rih lo. Hnehna chang se point ruka sang fal zui leh thei tur an nih laiin point khat an hmu thei hram a, an hmahruaina a derthawng ta hle.
Brentford hian an mikhual Arsenal an ngam viau a, chawlhlawk hmain goal chang tam zawk an nih bakah goal thun theihna hun nei tha zawk an ni tel bawk. Arsenal si nghak David Raya ball pek fuh tawk loh vangin goal an thun teuh hle a. EPL-a Golden Glove dawn zawn thei Raya hian a chetsualna siamthain pui zetin a save a, an team a chhanhim. Arsen al pawhin goal thun theihna hun tha nei ve bawk mah se goal an thun thei bik lova, chawlhlawk hmain goal lut a awm thei lo.
Chawlhlawk hnu lamah inkhel a hmuhnawm zui viau a, an inthlakkual chhawr tangkaiin Arsenal an khel tha ta viau a, goal thun hmasa zawkah an tang ta nge nge. David Raya chet that vanga an him nawn leh hnuin Gunners hian ball kang atangin goal an thun. Noni Madueke chuan minute 61-naah fuh ang reng takin a tauh goal a, hmahruaina goal a thun ta nge nge.
Goal thun hmasa zawk an nih vangin Arsenal hi phur viau mah se an phur rei lo. Goal an chhuah hnuin Brentford an khel tha sauh a, game a inthlak nghal thawk bawk. Brenford hian fuh zetin Arsenal an nawr tlang a, Raya chet that zarah Igor Thiago chuan pet tha viau mah se an si phurh a sut thei lo. Thiago-a’n a hun tha neih a hlah hnuin corner atangin hlauhawm an siam zui leh a, an la hlawhtling chuang lo. An hun tha neih hlah zel mah se an tana hun ruat a thleng a, dan rual lohin goal an thun ta nge nge. Long throw atanga hun tha an neih an chhawr tangkai a, Keane Lewis-Potter chuan minute 71-naah chiang zetin a tauh goal a, an si phurh a sut.
Goal khat ve ve an thun hnuin chak tumin tan an khawhzui nasa hle a, inkhel a hmuhnawm hle. Fuh zeta nawr tlangin Brentford in goal thun theihna hun tha an nei zawn. Igor Thiago chuan goal a thun ngei tura ngaih a nih laiin Arsenal defender Cristhian Mosquera chuan tha zetin a block a, Gunners a chhanhim. Hemi hnu hian Thiago hian hun tha a nei zui leh a, goal chungah pet liam fuain a hun tha neih a hlah zui leh. Brentford in an hun tha neih an hlah zawn hnuin Arsenal in hun tha an nei zui ve leh a, Gabriel Martinelli chuan uiawm takin a hun tha neih a hlah ve bawk. Inkhel hmuhnawm takah goal a luh belh thei tawh lova, 1-1 in an inhnehtawk zui ta a ni.
Brentford laka chak zo lo Arsenal hian khelh 26 atanga 57 hmuin hma la hruai zui tho mah se an hmahruaina a pan tawh viau thung a. Point li leka an san tawh vangin an hnuai chiaha awm Manchester City an phur thar hluai a ni ber mai.