ARSENAL an tlang, UNITED an tla

January 11, Pathianni zan khan FA Cup third round khelh chhunzawm a ni a, Portsmouth lehthalin Arsenal an tlang. Arsenal an chak laiin Manchester United erawh chuan Old Trafford-ah ngei Brighton & Hove Albion hneh lovin an tlawm ve thung.
Martinelli a vul
FA Cup-a champion ngun ber Arsenal hi Championship Club Porsmouth FC hmachhawn turin Fratton Park-ah an lenglut. Mikhual an nihna hmunah bul an tan chhe viau a, goal an chhuah hma hle. Hma takah goal chhuah mah se an insiamtha thuai a, Gabriel Martinelli hattrick hmangin hnehna an chang let a, Porsmouth hi 4-1 ngawtin an lehthal, champion thei turin hma lam an pan tluang zel.
Championship-ah 21-na ni mek Portsmouth hian an mikhual Arsenal lakah bul an tan tha viau a. Colby Bishop chuan inkhel tan atanga minute thumna lekah hmahruaina goal a thun nghal. Team lian lakah hma taka goal an thun vangin phur viau mah se an phur rei lo thung. Hmahruaina goal an thun atanga minute nga hnu lekah Andre Dozzell chuan an lamah a ti-goal a, Arsenal si phurh a sutsak.
Arsenal in an si phurh an sut hnuin game a danglam nghal hlawk. EPL leh Champions League-a table chung ber luahtu Arsenal in game an thunun a, an khingpuite an kat kual a ni ber mai. Na taka an khingpuite an nawr rah an seng a, minute 25-naah Gabriel Martinelli chuan N.oni Madueke siamsak atangin hma an hruai letna goal a thun a. Gunners hian 2-1 a hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal hnih an thun belh leh. An goal hnihna thuntun Gabriel Martinelli chuan minute 51-na lekah an goal thumna a thun a, an hmahruaina a tizauh belh.
Championship club lakah si hniha hma an hruai vangin Arsenal hian chak theihna hun tha lehzual an nei a, a dinhmun a tha viau tawh. Dinhmun tha takah ding tawh mah se an duhtawk mai lova, goal tam zawk thun tumin an khingpuite an nawr zui zel. Goal hnih thun tawh Martinelli chuan minute 72-naah an goal lina a thun zui le a, hattrick a siam. Martinelli hattrick hmangin Arsenal hian Portsmouth lakah 4-1 in hnehna an chang let a, fourth round an inhlangkai zui ta a ni.
FA Cup-ah vawi 14 champion a, champion ngun ber ni mek Arsenal hian Championship club Portsmouth lakah an second team an chhawr a. EPL leh champions league lamah bul tan thin zingah centre-back Gabriel Mangalheas chauhin bul a tan. Heti chung hian an khel tha em em tho mai a, hei hian champion awm tak an nihzia an tilang chiang leh zual.
Manchester United an tla
FA Cup a champion ngun ber Arsenal an chak laiin champion ngun ber dawttu Manchester United chu Old Trafford-a an mikhual Brighton hneh lovin an tla a, an mualpho ve thung.
Manager nghet nei lo, Darrent Fletcher-a’n a lo enkawl lailawk United hian Old Trafford-ah hnehna chan ngei tumin tan an khawh a, an che chhe lutuk lem lo. An mualah khel chhe lem lo mah se EPL club tho an tum a, khingpui an neih vanduai an tuar a ni ber mai. United forward Bejamin Sesko chuan Reuben Amorim awm lo a chhawr tangkai zui zel a, Brighton laka United goal neih chhun thuntu a ni.
Old Trafford a lenglut Brighton hian an khel tha viau a, chak phu zawk an ni. Inkhel tan atanga minute 12-na lekah Brajan Gruda chuan hmahruaina goal a thun nghal. Team lian lakah hma taka goal an thun hian an fuih phur viau a, inrintawk takin Old Trafford-ah an inlan zui theih phah.
United in an si phurh sut ngei tumin tan an khawh a, Brighton in goal thun belh an tum ve bawk a, inkhel a hmuhnawm hle. Inkhel hmuhnawm takah goal lut a awm belh theih loh reng hnuin United forward hlui Danny Welbeck chuan minute 64-naah Brighton goal hnihna thunin, an hmahruaina a tizau.
An mualah ngei goal an chhuah zawn vangin United dinhmun a chhe hle. An si phurh an sut theih loh reng hnuin Benjamin Sesko chuan hun tawp dawn hnaih lam minute 85-naah goal thunin an si phurh a sut then. Sesko hian Amorim chhuah hnuah vawi hnih khelin goal thum a thun a, a chetha rih hle. Sesko goal thun vangin Red Devils phur hluai mah se an phur rei lo. Minute 89-naah rawlthar beiseiawm Shea Lacey hnawhchhuah a ni. Si phur zawk ni chunga tlem zawk an nih leh zel vangin United dinhmun a chhe tak zet tawh a, phum ang hlauh an ni hial tawh. Dinhmun chhe taka ding United hian an si phurh an sut thei tawh lova, an mualah hreh tak chungin an tlawm a. FA Cup atanga hnawhchhuah niin, an puanthuah an tel fel ta a ni.
Insiamthat tum thin mah se Manchester United tan a la fuh tak tak thei lova, lei rem an la rap hleithei rih lo. English team lian leh ropui United hi League Cup (Carabao Cup) atangin an tla tawh a, FA Cup third round ah hnawhchhuah an ni zui leh. Kum 44 zet hnuah League Cup leh FA Cup atanga an tlak hma ber tum a ni hial a, hun chhe tak an tawng mek. League Cup leh FA Cup-a a an chetchhiat bakah EPL-ah pawh hma an sawn hleithei meuh lo bawk a. United tan kum chhe tak a ni mek.
Result dang
Pathianni zana inkhel dangah EPL a talbuai West Ham United chuan an mikhual Queens Park Rangers chu 2-1 in an hneh a, fourth round an inhlangkai. Leeds United pawhin mikhual an nihna hmunah 3-1 in mualneitu Derby County an hneh ve bawk.