Arsenal chak laiin Chelsea chak zo lo

Inrinni zan khan English Premier League 2025-26 khelh chhunzawm a ni a, London club lian Arsenal in an mualah awlsam takin hnehna an chang. Arsenal rual hian London club lian Tottenham Hotspurs pawhin hnehna an chang a, hetihlai hian Chelsea erawhin hnehna an chang zo lo thung.
Zubimendi a vul
Nipui bazarah player thar lei nana sum seng nasa Arsenal hian Emirates Stadium-ah Nottingham Forrest an mikhual. Nottingham Forrest an mikhual tumin manager Arteta chuan an player thar panga ngawt bul a tan tir a, an player tharte an chetha hlawm hle nghe nghe. Real Sociedad atanga an lak luh Martin Zubimendi chuan goal hnih a thun a. Goal thu tura an lak luh Viktor Gyokeres pawhin a tih tur tiin goal a thun bawk. Goal thum an thun theih nan an forward thar Noni Madueke leh ten an thawhhlawk viau bawk.
Arsenal hian 14-naa awm mek Nottingha Forrest lakah bul an tan tha a, ball chang tamin hlauhawm pawh an siam fo. Hlauhawm siam fo mah se goal erawh an thun thei mai bik lo. An tlarhmaa player pathum; Eze, Gyokeres leh Madueke te an khelh tlan vawi khatna a ni a, an la inman tawk lo. Mah se, an khel tlang rei a, Arsenal hmabak enzia tilang chiangtute an ni thung a, an hlauhawm thei hle. Inkhel hmuhnawm takah goal lut a awm theih loh reng hnuin Zubimendi a inlar a, goal a lut ta nge nge. Midfielder hmuhnawm Zubimendi hian minute 32-naah box pawn atangin pui zetin a hlap lut a, hmahruaina goal a thun. Box pawn atanga Zubimendi goal thun hmasak ber hmangin Arsenal hian si khat faia hmahruai chungin chawlhlawk an hmang.
Chawlhlawk hnu lamah Arsenal an khel tha leh zual a, goal pawh an thun thuai. Second half tan atanga minute khatna lekah Eze siamsak tha zet mai chu Viktor Gyokeres chuan awlsam takin a pet goal a, Gunners goal hnihna a thun. Gyokeres hian EPL-ah Arsenal tan vawi li khelin goal thum ngawt a thun tawh a, a hna a tlin rih hle. EPL season kal meka goal thun tam ber zingah tel mek bawk.
Goal hnih an thun hnuin manager Mikel Arteta a inthlahdul hret a, thawhleh zana Champions League an khelh tur thlirin a player tha thenkhat a lachhuak a, khel tlem zawk a lih tir. A player thlak kual bawk mah se an mikhual Nottingham Forrest lakah an chungnung zui zel thung a, goal dang an thun belh leh bawk. Inkhel tawp dawn hnaih minute 79-naah goal hmahruai thuntu Martin Zubimendi chuan mawi leh fuh zetin a tauh goal a, an goal thumna a thun. Zubimendi goal thun hnu hian goal dang a luh belh tawh lova, Arsenal in an mualah 3-0 in hnehna an chang zui ta a ni.
EPL-ah champion chaka tuihal Arsenal hian EPL 2025-26-ah vawi li khelin vawi thum an chak tawh a, tlawm zawkah vawi khat an tang tawh thung. An hneh loh awm chhun hi champion lai Liverpool an ni. Nottingham Forrest an hmachhawn tum hian an player pawimawh William Saliba leh Bukayo Saka te hliam vagngin an inlan thei lo va, captain Martin Odegaard pawh rei a khel thei lova, minute 18-na lekah lakchhuah a ngai bawk. Odegaard ang bawk hian midfielder hmuhnawm Declan Rice pawh bul tantir a ni lo bawk. An player thate an chhawr thei lo nual nain 3-0 ngawta hnehna an chang hian Arsenal hi champion thei an nihzia tilang chiang leh zualtu a ni. Forrest laka point thum an hmuh hmangin Arsenal hian point 9 hmuin table chung ber an luah lailkawk rih.
Spurs an kal zel
EPL 2025-26 a bul tan tha Tottenham Hotspurs chuan inrinni zan khan Mimualah West Ham United an hmachhawn a, mikhual an nihna hmunah 3-0 a hnehna changin point thum an hmu.
London Stadium-a inkhelah West Ham leh Tottenham te an inhnehtawk viau a, goal pawh a lut lawk thei lo. Chawlhlawk hmaa goal lut a awm theih loh hnuin chawlhlawk hnu lamah West Ham an chesual a, goal an chhuah. Tottenham tan hian Pape Matar Sarr chuan minute 47-na lekah hmahruaina goal a thun. Goal an chhuah hnuin Hamemers an buai zui viu a, minute 54-na lekah Tomás Soucek hnawhchhuah a ni.
Tam zawk an nih hnuin Tottenham an khel tha chhunzawm a, goal pawh an thun belh leh thuai. Minute 57-naah Lucas Bergvall chuan Tottenham goal hnihna a thun a. Minute 64-naah Micky van de Ven chuan an goal thumna a thun zui leh a. West Ham lakah 3-0 a hnehna changin point thum hlu tak an hmu zui ta a ni.
Tottenham hi London hmar venga an elpui lian Arsenal ang thovin season tharah an khel tha a, vawi li khel tawhin vawi thum an chak a, vawi khat an tlawm. Khelh thum atanga point 9 hmuin Arsenal nen an point hmuh zat inang mah se pahnihnaah an awm rih thung.
Chelsea an chak zo lo
Inrinni zanah London club lian Arsenal leh Tottenham in hnehna an chan laiin Chelsea erawh an chak zo lova, mikhual an nihna hmunah Brentford nen 2-2 in an inhnehtawk.
Gtech Community Stadium-a London derby-ah mualneitu Brentford in bul an tan tha a, a tawp an khar tha tel bawk. Brentford tan hian Kevin Schade chuan minute 35-naah hmahruaina goal a thun. He goal hmang hian hun rei tak chhung hma an hruai. Goal lut a awm belh theih loh reng hnuin Cole Palmer chuan minute 61-naah goal thunin an si phurh a sut. An si phurh an sut hnuin Chelsea an khel chhunzawm a, Moisés Caicedo chuan minute 85-naah hma an hruai letna goal a thun.
Chelsea in hma an hruai let hnuin goal dang a luh belh thei lo reng a, an mualah ngei Brentford an tlawm teuh hle. Hun pangngaiah an si phurh an sut theih loh hnuin hun pek belhah Brentford an che fuh ta nge nge a, minute 90+3-ah Fábio Carvalho hmangin an si phurh an sut. Carvalho goal thun hmangin team lian Chelsea lakah tlawm an pumpelh thei hram a, an mualah ngei point khat hlu tak an hlawhchhuak zui ta a ni.
Season tharah tlawm la nei lo mah se Chelsea an khel tha lutuk lo. Vawi hnih chak tawhin draw vawi hnih an nei a, khelh li atangin point 6 an hmu mek. Hetihlai hian Brentford in khelhli atangin point li an hm ve thung.
Irinni zana inkhel dangah AFC Bournemouth chuan 2-1 in an mikhual Brighton an hneh. Newcastle United in 1-0 a an mikhual an hneh rualin Fulham pawhin 1-0 in an mikhual Leeds United an lo hneh ve bawk.