Arsenal in hma an hruai chhunzawm
Nilai zana UEFA Champions League 2023-24 khelhah Arsenal chuan an mikhual Sevilla chu si hnih faiin an hneh a, Group B-ah hma an hruai chhunzawm zel. Group B a inkhel dangah PSV Eindhoven chuan si khat faiin Lens an hneh ve bawk.
Aesenal hian Spain rama an va hneh tawh Sevilla lakah harsatna lian tawk lovin hnehna an chang a, an mualah ngei nuamti takin an khel. EPL season kal mekah a vawi khat nan an tlawm hnu lawkah Gunners an buai zui lova, UCL-ah an insiamtha zui leh nghal. Emirates Stadium-ah Sevilla an mikhual tum hian hliam vangin Arsenal forward pahnih Gabriel Jesus leh Eddie Nketiah te an inlan thei lo. Gabriel Jesus leh Eddie Nketiah te an inlan thei loh vangin Leandro Trossard-a’n hmun a chan phah a, goal a thun hial nghe nghe. Trossard hian Bukayo Saka siamsak tha tak chu minute 29-naah awlsam takin a pet goal a, hmahruaina goal a thun.
Gunners hian an mikhualte nawr zui viau mah se goal an thun belh lawk thei lova, goal thun turin an nghah leh reng a ngai. Hun rei tak chhung goal lut a awm theih loh hnuin minute 64-naah Bukayo Saka chuan Gabriel Martinelli siam sak atangin an goal hnihna a thun a, an hma-hruaina a tizau. An mualah ball chang tamin, khel tha zui viau mah se Arsenal hian goal an thun belh thei lo naa, an mualah si hnih faiin an chak zui ta tho a ni.
An mualah an chak zui leh tak vangin Arsenal hian khelh li atanga point kua hmuin hma an hruai chhunzawm a, last 16 an hnaih leh zual phah sawt. Arsenal in hma an hruai chhunzawm laiin Euroa League champion Sevilla erawh chu Champions League-ah an chak thei lo chhunzawm zel thung a. La Liga club hian khelh thum atanga point 2 chauh hmuin, table mawngphah an luah nghet.
Group B-a inkhel dangah Netherlands club lian PSV Eindhoven chuan Philips Stadion-a an mikhual Lens chu minute 12-na leka Luuk de Jong goal thun hmangin an hneh a, an mualah point thum hlu tak an hmu. An mualah hnehna an chan hmangin PSV hian khelh li atangin point nga an hmu mek a, pahnihnaah awmin Arsenal nen an inkarah point li a la tla zep mek. PSV laka chak lo Lens hi Group B-ah Arsenal hneh thei awmchhun an ni a. French club hian khelh li atanga point li hmuin pathumna an luah a, last 16 lut turin beiseina sang tak an la nei a. Lens hian khelh hnih khelh hmabak an la nei