Arsenal in Liverpool an hnaih

Inrinni zana English Premier League khelhah pahnihnaa awm mek Arsenal in hnehna an chang a, hmahruaitu Liverpool an hnaih leh zual. Arsenal in Mimualah hnehna an chan lai hian Manchester City chuan an mikhual Newcastle United chu 4-0 ngawtin an lo sawp ve bawk.
King Power Stadium-ah chak mamawh tak chunga lenglut Arsenal hi hliamin a tibuai nasa a, tlarhma player tha chhawr tur an van. Gabriel Jesus leh Kai Havertz te hliam vanga an chawlh vangin manager Mikel Arteta chuan Leandro Trossard chu tlar hmaah a lai a luah lumtir. An forward thate an inhliam nasat vangin ngai an awh lo viau a, Leicester City lakah goal an thun har phah hle.
Inkhel hmuhnawm takah hian goal a lut lawk thei lo va, team hnihte an innawr tawk hle. Hun rei tak chhung goal a luh theih loh hnuin Raheem Sterling thlaktu Mikel Merino chuan hun tawp dawn hnaihah danglamna lian tak a thlen a, goal hnih a thun. Mikel Merino hian minute 81-naah Ethan Nwaneri siamsak atangin hmahruaina goal a thun a. Hmahruaina goal a thun atanga minute ruk hnuah Leandro Trossard siamsak atangin Merino chuan an goal hnihna a thun zui leh a, Foxes mualah si hnih faiin hnehna an chang zui ta a ni.
Leicester City lakah hnehna chang a, point thum an hmuh hmangin Arsenal hian khelh 25 atangin point 53 an hmu a, an chunga awm Liverool nen an inkar an tizim. Hmahruaitu Liverpool nen hian point li chauhin an inthlau tawh a, an inhmachhawn zui leh dawn bawk vangin Gunners in champion theih beiseina an nei sang hle. Liverpool hian Pathianni zan khan Wolves an hmachhawn a, an mualah hnehna an chang a nih chuan Arsenal nen an inkarah point 7 a tlazep nawn leh thung ang.
City chakpuitu Marmoush
Inrini zana inkhel dangah champion lai Manchester City chuan Omar Marmoush hattrick hmangin an mikhual Newcastle United chu 4-0 in an sawp a, top 4 huang an luah nghet.
City hian an mikhual Newcastle United lakah an khel tha hle a, chawlhlawk hmain goal thum ngawt an thun hman. City tan hian thlasik bazar inhawn laia an lak luh Omar Marmoush chuan minute 19-naah hmahruaina goal a thun. Goal hmahruai thuntu Marmoush hian minute 24 na leh minute 33-naah goal a thun zui leh a, a club thar Manchester City tan a vawi khat nan hattrick a siam. Mormoush hian EPL champion Manchester City tan EPL-ah vawi thum khelin goal thum a thun tling ta chiah a, League harsa English Premier League-ah bul a tan tha hle. Mormoush goal thum thun bakah hian City tan James McAtee chuan minute 84-naah City goal lina a thun ve bawk.
Inrinni zana inkhel dangah pathumnaa awm mek Nottingham Forrest chu mikhual an nihna hmunah Fulham hneh lovin an tlawm. Fulham lakah an tlawm vangin Nottingham Forrest dinhmun a derthawng hret hret a, top 4 huang atanga nekchhuah tumin club lian zawk ten an hnaih hret hret. Forrest hi an hnuaia awm Manchester City nen point thum chauhin an inthlau tawh a, champions league khel phak turin nghet zawka hma lam pan an mamawh.
Inrinni zan hian table mawngphaha awm Southampton chu an mikhual AFC Bournemouth lakah 3-1 ngawtin an tlawm a, tlakhniam an hnaih deuh deuh zel. Table hnuai bera awm mek Southampton hian khelh 25 atangin point kua chiah an la hmu a. An chung chiaha awm Leicester City aia an hniam zawkna hi point 11 zet a ni tawh. Heti a nih vang hian championship lamah an tlakhniam nge nge a rinawm deuh deuh zel.