Arsenal in ‘Next season’ sawi an tum tawh lo

Arsenal nena inhmeh tawh tak chu ‘Next Season’ a ni. Gunners hian season kal mekah trophy an chawi hmel tawh lova, kut bengin season an khar hmel. FA Cup third round paltlang zo lovin an tla a, Carabao Cup semi-final paltlang zo lovin an tla leh bawk. Champions League-ah last 16 lut tawh mah se champion tur em chuan an kawng a harsa dawn. UCL-ah champion tura rinkai an nih loh rualin EPL-ah point 13 laiin hmahraitu Liverpool an phak lo mek bawk. Heti a nih vang hian Arsenal chuan ‘Next season’ an sawi leh der tawh.
Arsenal hi an sporting director thar Andre Berta hovin nipui bazar inhawn hunah an squad thuam chak thar an tum viau dawn a. Player thar lak tum an dap \an nghal vut vut. Gunners player thar ni tura ngaih leh season tharah an first XI ni thei tura ngaihte inrinsiakna lian tak a awm. Season tharah Arsenal first XI ni thei tura ngaihte kan tarlang ang/
Arsenal hian si nghak an nei \ha thawkhat viau a, an si nghak David Raya chu season liam ta khan EPL-a goalkeeper \ha ber a ni a. Raya hian season kal meka inelna hrang hrangah clean sheet vawi 15 zet a nei tawh bawk. A chet \hat tluang vangin season tharah pawh David Raya hi Arsenal si nghal rinrawl ni leh tura ngaih a ni.
Gunners hian defender an nei \ha viau a, an defender nei mekte hi an chhuak a nih ngawt loh chuan defender thar an mamawh hran lo. Right-back-ah Jurrien Timber a rintlak viau a. Centre-back-ah William Saliba leh a kawppui fuh tak Gabriel te an rintlak viau bawk. Hetihlai hian tunlaia centre-back \ha ber pawla ngaih William Saliba hi an duh zawng player hlah ngai lo Real Madrid in lak an duh niin tarlan a ni a. Real Madrid in an duh a nih ngai chuan Saliba hian Arsenal a chhuahsan hreh hauh lo tura ngaih a ni. Saliba a chhuak a nih chuan Arsenal hian a hmunruak luahtu tur \ha an dap fe a ngai ngei ang.
Left-back lamah hmun inchuhna a na dawn a, Ricardo Calafiori leh Arsenal academy chhuak Myles Lewis-Skelly ten hmun an inchuh viau dawn a. Arsenal hian an pumchhuak Myles Lewis-Skelly an chhawr rim zawk tura ngaih a ni.
Mual lai lamah West Ham a\anga £100million zet senga an lak luh Declan Rice chu a inhliam a nih ngawt loh chuan player pawimawh a ni chhunzawm ngei tura ngaih a ni. Rice-a’n hmun pawimawh a chan zui laiin Jorginho leh Thomas Partey ten Emirates Stadium an chhuahsan ngeiin a rinawm thung. Heti a nih vang hian Real Sociedad a\anga lak an tum Martin Zubimendi chu Rice kawppui fuh tak ni thei tura ngaih a ni. Attacking midfield-ah captain Martin Odegaard a pawimawh chhunzawm tura ngaih a ni bawk.
Arsenal mual laiah player thar pakhat awm thar tura ngaih a nih laiin forward lamah inthlakthlengna hian a thleng tura ngaih a ni. No 9 potision pangngai nei lo Gunners hian RB Leipzig a\angin Benjamin Sesko lak an tum dawn a. Sesko hi an striker rinrawl ni nghal tura ngaih a ni bawk. Arsenal striker lak an duh ber chu season kal meka goal thun thei tak Alexander Isak a ni a. Mah se Isak hi Newcastle United in £100million zet an chhiar a. A man an chhiar to lutuk hi Gunners kawng daltu lian a ni thei dawn. Isak an la thei dawn lo a nih chuan Euro 2024 khelh hma ata tawh an lo awh ruk \hin Benjamin Sesko an lak zawk a rin awm a. Sesko hi £55m senga lakchhuah theih tur a ni a, Gunners tan Sesko lakchhuah hi a duh a nih phawt chuan a hautak lua dawn lo.
Sesko chawm tur hian hliam vanga chawl mek Bukayo Saka a pawimawh chhunzawm dawn a, Saka bakah hian Spain leh Athletic Bilbao tana vul tak Nico Williams chu Arsenal tlarhma mawitu thar ni tura beisei a ni bawk. Arsenal hian Williams hi an hmutai viau a, nipui bazar inhawn hunah lak ngei tumin thapui an thawh ngei rin a ni. Sesko leh Nico Williams te an la lut thei dawn a nih chuan Arsenal hian an forward pahnih Leandro Trossard leh Garbriel Martinelli te chu sum tuak nan hralh ngei an tum ve thung dawn. Trossar leh Martinelli te hi Saudi Arabia club ten lak an duh a, hlawh sang zawk an hlawh theih dawn vangin Arsenal chhuahsan an hreh lo tura ngaih a ni bawk.
Thlasik bazarah beisei anga an bazar theih loh vangin manager Mikel Arteta a lung ni lo viau. Inthuam chak thar hunah an inthuam chak loh vangin trophy lak nei lovin season an khar leh dawn niin a lang ta bawk. Heti a nih vang hian Arsenal \antute an ngui viau a, nipui bazar inhawn hunah champion ngei turin inthuam thar an tum dawn a. Nipui bazar a talna ber tur zinga mi chu Arsenal hi an ni ang.