Arsenal in Quarter-final an lut

March 7, Inrinni zan khan FA Cup Pre-quarter-final khelh a ni a, Arsenal in hnehna changin quarter-final an lut. Arsenal rual hian team lian Manchester City leh Chelsea ten hnehna changin quarter-final an lut ve bawk. Season kal mekah Arsenal leh City te trophy lian pali lak tumin an inel chhunzawm zel.
FA Cup a champion hnung ber Arsenal hian pre-quarter-final-ah team lian pumpelhin League One club Mansfield Town F.C an hmachhawn. An khingpuite hi EPL hnuai, hnuai leha mi an nih vangin Gunners hi chak ngei tura ngaih sa an ni a. Chak tura rinkai zawk ni chiang viau mah se awlsam takin hnehna an chang thei bik lo thung a, 2-1 in an chak hram a ni ber mai.
One Call Stadium a lenglut Arsenal tan hian Noni Madueke chuan minute 41-naah hmahruaina goal a thun. He goal hmang hian 1-0 a hmahruai chungin chawlhlawk an hmang. Hmahruai chungin second half hmachhawn mah se Gunners in hma an hruai rei lo hle a, minute 50-na lekah mualneitu Mansfield ten Will Evans chuan goal thunin an si phurh a sut. Goal an thun vangin phur thar bawk mah se Arsenal tan Eberechi Eze chuan minute 66-naah hma an hruai nawn lehna goal a thun a, he goal hmang hian hnehan an chang a, quarter-final an inhlangkai zui ta a ni.
Manfield an hmachhawn tum hian Arsenal manager Mikel Arteta chuan rawlthar kum 16 mi pahnih; Marli Salmon leh Max Dowman te a khehtir. Kum 16 leh ni 66-a upa Dowman chu Arseanl tan FC Cup-a bul tan thei naupang ber a ni a, club record thar a siam hial nghe nghe. Arsenal tana record thar siamtu Dowman hi Mansfield lakah a khel tha hle nghe nghe a ni.
Arsenal in League One club lakah hnehna an chan laiin Manchester City chuan EPL club Newcastle United lakah hnehna an chang a, quarter-final an lut ve bawk. City hi Newcastle United hmachhawn turin St James Park-ah an lenglut a. Mikhual an nihna hmunah goal chhuah hmasa bawk mah se 3-1 in hnehna an chang let a, hnehna hlu an chang.
.Newcastle hian an mikhual Manchester City hneh ngei tumin tan an khawh a, inkhel tan atanga minute 18-na lekah Harvey Barnes chuan hmahruaina goal a thun nghal. Hma takah goal thun bawk mah se Magpies hian City an chhaihkawlh a ni lek fang a, an erlet an tuar lo hle. City tan hian Savinho chuan minute 39-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah City an khel tha zui viau a, minute 47-na lekah Omar Marmoush chuan hma an hruai letna goal a thun. An goal hnihna thuntu Marmoush hian minute 65-naah an goal thumna a thun zui leh a, an chakna a nemnghet. City hian EPL-a an hmachhawn leh tur Newcastle lakah hnehna an chang zui ta a ni.
Season kal meka inelna hrang hrang paliah Arsenal leh City te champion thei dinhmunah an la ding vek a. Anni pahnih hi trophy lian pali lak tumin an inel zui hle ngei dawn.
Inrinni zana inkhel dangah London club lian Chelsea chuan Mimualah an khingpui Wrexham chu 4-2 in an hneh ve bawk