Arsenal kawng dal thei an awm lo

Thwhleh zan khan UEFA Champions League 2025-26 khelh chhunzawm a ni a, Arsenal chuan 3-0 ngawtin Slavia Prague an hneh. Inelna hrang hrangah goal chhuah lovin Arsenal an chak zel a, Laipui hmaa ding zo a awm rih lo. Arsenal rual hian Tottenham pawhin awlsam takin hnehna an chang ve bawk.
Ssason kal meka chetha, goal thun thei leh goal veng him thiam Arsenal hi Czech Republic (Czechia) club lian Slavia Prague hmachhawn turin Fortuna Arena-ah an leng lut. Mikhual an nihna mualah an tlangnel hle a, hliam vangin Viktor Gyyokeres chhawr thei lo mah se a hmun ruak luahtu Mikel Merino chuan goal hnih a thun a, harsatna an tawk lo.
Mikhual an nihna hmunah Arsenal hian khel tha mah se goal erawh an thun mai thei nik lo. Field goal an thun theih loh reng hnuin penalty an hmu hlauh. Penalty hi Bukayo Saka chuan a pet goal a, minute 32-naah hmahruaina goal a thun. Goal thun theihna hun tha dang neih belh bawk mah se Gunners hi an hlawhtling zui mai lova, 1-0 a hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, Gyokeres hmunruak luahtu Mikel Merino chuan minute 46-naah an goal hnihna thunin, an hmahruaina a tizau a. Mamawh chhanna ni fo thin Merino hian minute 68-naah a goal thumna a thun zui leh a, an chakna a nem nghet.
Slavia Prague hian an si phurh sut tumin tan an khawh nasa hle a, an hlawhtling teuh viau nghe nghe. Hun tawp dawn hnaih lamah Slavia Prague hian penalty an hmu hman zuai a, VAR rawn a nih hnuin an penalty hmuh hi sut a ni leh thung. VAR thutlukna vangin Arsenal an him hram a, a zawnin vawi riat ngawt clean sheet an neih theih phah. Merino goal thun hnu hian goal dang a luh belh thei tawh lova, Arsenal chuan 3-0 in hnehna an chang zui ta a ni.
Tarlan tawh angin Arsenal hi inelna hrang hrangah an chetha hle a, season kal mekah a zawnin clean sheet vawi 8 an nei tawh a, hei hi kum 1903 a an club record a ni a. Club record thar siam turin clean sheet vawi khat neih leh an la mamawh a. EPL a an hmachhawn zui leh tur Sunderland lakah goal an chhuah lo a nih chuan club record thar a siam ang. Chetha tluang Arsenal hi UCL-ah a zawnin vawi li an chak ta chiah a, Bayern Munich nen a zawna vawi li chak thei awmchhun an ni rih.
Slavia Prague lakah 3-0 an chak tum hian rawlthat Max Dowman chuan inkhel a hmachhawn a, champion League hmachhawn thei player naupang ber niin record duhawm tak a siam nghe nghe.
Tottenham an chak
Thawhleh zana inkhel dangah London club lian Tottenham in awlsam takin hnehna an chang a, an mikhual F.C. København chu 4-0 ngawtin an sawp a, point thum an hmu.
Tottenham hian an mikhual F.C. København lakah an khel tha viau a, Brennan Johnson chuan minute 19-naah hmahruaina goal a thun nghal. Chawlhlawk hmain goal dang tun belh thei tawh lo mah se chawlhlawk hnu lamah an chetha leh zual a, Wilson Odobert, Micky van de Ven leh João Palhinha ten goal khat theuh an thun a. Minute 57-naah Brennan Johnson hnawhchhuah ni bawk mahse an result a danglam phah chuang lova, awlsam takin an chak ta tho a ni.