Arsenal leh Barca an chak

Pathianni khan season thar atana inbuatsaih nan club hrang hrangte an inkhel hlawm a. Friendly match-ah Arsenal leh Barcelona ten hnehna an chang.
London club lian Arsenal hian Singapore-a National Stadium-ah EPL club Newcastle United an hmachhawn. An forwawrd thar Viktor Gyokeres hmuh laiin an khingpui lakah bul an Tan Tha lova, goal chhuah hmasa zawkah an Tang. Newcastle United tan hian an forward thar Anthony Elanga goal minute 6-na lekah hmahruaina goal a thun a, a club thar tan bul a Tan Tha viau. 
Hma takah goal chhuah mah se Arsenal an buai zui lova an insiamTha thuai. Chawlhlawk dawn hnaih minute 33-naah Mikel Merino chuan goal thunin an si phurh a sut. An si phurh an sut hnu lawkah Gunners hian na takin an khingpuite an nawr zui nghal zat a, goal pawh an thawkchhuak leh thuai. Minute 35-naah Magpies defender Alex Murphy chuan an lamah a ti-goal palh hlauh a, 2-1 hnufual chungin chawlhlawk an hman a ngaih phah.
Chawlhlawk hnu lamah Newcastle United in bul an Tan Tha zui leh a, goal thun hmasa zawkah an Tang leh. Minute 58-naah Jacob Murphy chuan goal thunin an si phurh a sut. Goal hnih ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Hun rei tak chhung goal lut a awm belh theih loh hnuin hun tawp dawn hnaiah Arsenal an vannei a, penalty an hmu. Penalty hi captain Martin Ødegaard chuan minute 84-naah a pet goal a, hma an hruai nawn lehna goal a thun. Ødegaard goal thun hnu hian goal dang a luh belh thei tawh lova, Arsenal chuan Newcastle United lakah 3-2 in hnehna an chang zui ta a ni.
Newcastle an hmachhawn Tum hian Arsenal forward thar Viktor Gyokeres chu National Stadium-ah pho lan a ni a. Nghakhlel taka an thlir, goal tam tak thun a, trophy lakpui leh tura an beisei Gyokeres hi No. 14 ha chungin a inlan a, a club thar Arsenal Tantute lawm a hlawh hle.
Barca pawh an chak
Singapore lamah Arsenal an chak lai hian Japan lamah Spain club lian FC Barcelona chuan hnehna an lo chang ve bawk a, an khingpui Vissel Kobe chu 3-1 in an hneh.
Noevir Stadium Kobe-ah Barcelona leh tualchhung club Vissel Kobe te an inhnehtawk hle. Goal lut a awm lawk theih loh hnuin minute 33-naah Eric García chuan Barcelona hmahruaina goal a thun. Team lian zawk Barca in goal thun hmasa mah se Vissel Kobe an buai mai lova, goal an thun ve thuai. Vissel Kobe tan hian Taisei Miyashiro chuan minute 42-naah goal thunin an si phurh a sut a, 1-1 a inhnehtak chungin chawlhlawk an hmang.
Chawlhlawk hnu lamah Barcelona an khel Tha chhunzawm a, goal hnih an thun belh leh. La Liga champion Barca tan hian Roony Bardghji chuan minute 77-naah hma an hruai nawn lehna goal a thun. 2-1 a hma an hruai hnuin Pedro Fernández chuan minute 87-naah an goal thumna thunin an chakna a nemnghet.
Vissel Kobe an hmachhawn Tum hian Barcelona player thar Marcus Rashford a inlan. Manchester United-a hmun pawimawh chang phak lo Rashford hian team ropui FC Barcelona chu loan in a zawm a, Catalan club lianah hian intuai thar lehin, invawrhsan leh zual a tum hle ngei ang.