Arsenal leh City in 4th round an lut

Nilaini zan khan English Caraboa Cup third round khelh chhunzawm a ni a, team lian Arsenal leh Manchester City ten hnehna changin fourth round an lut. Arsenal leh City rualin Tottenham leh Newcastle United ten hehna an chang ve bawk.
Arsenal 2-0 Port Vale
EPL-ah pahnihna ni mek Arsenal hi League One-ah pahnihna nei mek Port Vale hmachhawn turin Vale Park-ah an lenglut. An len luhna mualah an khel tha viau a si hnih faiin hnehna an chang. Mimuala inkhel hmachhawn mah nise Gunners hian an khingpuite an ngam viau a, inkhel tan atanga minute riatna lekah an player thar Eberechi Eze chuan hmahruaina goal a thun. Arsenal tan Eze goal hmang hian hun rei tak chhung hma an hruai.
Hma takah goal thun bawk mah se Gunners in League One team lakah goal an thun belh thei lawk lo. Goal lut a awm belh theih loh reng hnuin hun tawp dawn hnaih minute 86-naah Leandro Trossard chuan an goal hnihna thunin an hmahruaina an tizau. Trossard goal thun hnu hian goal dang a luh belh thei tawh lo va, Arsenal chuan si hnih faia hnehna changin fourth round an lut ta a ni. Port Vale hnehtu Arsenal hian fourth round-ah EPL club Brighton an hmachhawn zui leh ang.
City 2-0 Huddersfield
Arsenal rual hian EPL team lian Manchester City chuan League One-a pangana ni mek Huddersfield Town an hmachhawn a, Mimualah si hnih faia hnehna changin fourth round an inhlangkai ve bawk.
Accu Stadium-a lenglut City hian bul an tan tha viau a, inkhel tan atanga minute 18-naah Phil Foden chuan hmahruaina goal a thun nghal. Hma takah goal an thun vangin City an inringtawk viau a, an khel tha zui viau bawk. Khel tha zui hle mah se goal erawh an thun belh thei mai bik lo. Hun rei tak chhung goal lut a awm belh thei loh hnuin hun tawp dawn hnaih minute 74-naah Savinho chuan an goal hnihna a thun a, an chakna a nem nghet ta nge nge.
Hudderfield hnawtchhuaktu Manchester City hian fourth round-ah team lian zawk pumpelhinn Swansea City an hmachhawn zui leh ang.
Newcastle 4-1 Bradford City
Nilai zan hian champion lai Newcastle United chuan an mual St James Park-ah League One-a hmahruai mektu Bradford City an mikhual a, an mualah 4-1 a hnehna changin fourth round an inhlangkai.
Newcastle hian an mualah bul an tan tha viau a, Joelinton chuan minute 17-naah hmahruaina goal a thun a. Hma takah goal an thun hnuin an khel tha chhunzawm a, minute hnih hnu lekah William Osula chuan goal a thun belh zui leh ta mai a, si hnih faia hmahruai chungin chawlhlawk an hmang.
Chawlhlawk hnu lamah Magpies an khel tha chhunzawm a, goal hmahruai thuntu Joelinton chuan minute 75-naah an goal thumna a thun. Newcastle in an goal thumna an thun hnu lawkah Andy Cook chuan Bradford tan goal thunin an si phurh a sut then. Goal chhuah mah see Magpies an buai zui lova, minute 87-naah William Osula chuan an goal lina a thun a, an mualah 4-1 in an chak zui ta a ni. Champion lai Newcastle hian khingpui hautak zawk an neih zui a ngai dawn a, fourth round ah Tottenham Hotspurs nen an inhmachhawn a ngai dawn.
Newcastle hmaa fiahna hautak hmachhawn tur Tottenham hian nilai zana an khingpui Doncaster Rovers chu 3-0 in an hneh.
Fourth round a intum turte:
Arsenal v Brighton
Grimsby Town v Brentford
Swansea City v Manchester City
Newcastle United v Tottenham
Wrexham v Cardiff City