Arsenal leh Inter Milan an chak

April8, Thawhleh ni zan khan UEFA Champions League quarter-final khelh tan a ni a. English club lian Arsenal leh Italian Serie A champion Inter Milan ten hnehna an chang a, pen khatin semi-final an hnaih.
Arsenal 3-0 Real Madrid
English Premier League-ah pahnihna ni mek London club lian Arsenal chuan Champions League-a club tha ber, UCL a danglam bik thin Real Madrid chu Emirates Stadium-ah an mikhual a. Tunhnaia English club ten an ngam loh Real Madrid hi 3-0 ngawtin an lo sawp. An mualah si thum fai ngawtin chak bawk mah se an khingpuite hi Real Madrid an ni miau a, Santiago Bernabeu-a lenglut tur an la ni bawk nen Arsenal tan ngaihtha taka awmna chi erawh a la ni lo.
Emirates Stadium-ah Arsenal leh an mikhual Real Madrid in inkhel hmuhnawm an lantir a, an inhnehtawk hle. Inkhel hmuhnawm takah hian goal lut a awm lawk thei lo va hlauhawm an insiam chhawk zak zak a ni ber mai. Goal lut a awm theih lawk loh hnuin Arsenal in goal an thun ta nge nge. Bukayo Saka free-kick hlawhchhuah chu midfielder Declan Rice chuan minute 58-naah mawi zet maiin a pet kual lut a, hmahruaina goal a thun.
An mualah goal an thun hmasak vangin Arsenal an phur a, inrintawkna sang ta nen an inlan zui ta bawk. Goal thun tuma an innawr tawn chhen hnuin Delan Rice bawk a inlar nawn leh. England midfielder pawimawh Rice hian minute 70-naah mawi leh tha turu zetin free-kick a pet goal nawn leh a, top corner-a a pet goal hmangin Real Madrid lakah si hnih faiin hma an hruai.
Goal hnih an chhuah zawn vangin Real Madrid an buai a, an inrintawkna an hloh nasa viau bawk. Hetihlai hian si hnih faia hmahruai tawh Arsenal erawh chu phur namen lovin an phur ve thung a. Goal mawi leh tha dang an thun zui leh. Striker pangngai chhawr tur an neih loh laia striker hna lo chelh lai lawktu Mikel Merico chuan mawi zetin a pet kual lut leh a, minute 75-naah an goal thumna a thun a, an hmahruaina a tizau. Merino goal thun hnu hian goal dang a luh belh tawh lova, Arsenal chuan Champions League-a vawk lal len Real Madrid chu si thum fai ngawtin an sawp ta a ni.
An mualah 3-0 ngawta hnehna an chan vangin Arsenal in semi-final an hnaih leh zual sauh. Si thum faia hma an hruaina hi second leg-ah humhim ngei an tum dawn a. Santiago Bernabeu-a an len luh hunah tlawm mah se first leg-a an chakna hi semi-final luh pui ngei tumin tan an khawh ang. Santiago Bernabeu-ah hian mikhual tan chet a har thin a. Real Madrid hi Champions League-ah chua n champion zia pu tlat reng mai an ni bawk a. An mikhual tur Arsenal lehthalin semi-final luh ngei a tum dawn. Arsenal an lehthal thei a nih chuan Los Blancos hian champion turin rin an kai leh zual sauh ang a, champions league-ah chuan ‘Real Madrid nge nge’ tih an ni nawn leh thin ang.
Inter Milan 2-1 Bayern Munich
Thawhleh zana UCL quarter-final inkhel dangah Italian champion Inter Milan chuan Allianz Arena-ah Bayern Munich an luhkhung. Inter Milan hian mikhual an nihna hmunah 2-1 in hnehna an chang a, an muala inhmachhawn zui leh tur an nih vangin semi-final luh theihna hun tha tak an nei.
Europe a team lian pahnih; Bayern Munich leh Inter Milan te hian inkhel hmuhnawm an lantir a, goal pawh a lut lawk thei lo. Goal lut a awm theih loh reng hnuin Inter Milan captain Lautaro Martínez chuan minute 38-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal hnih a luh belh leh. Hun rei tak si an phurh hnuin Bayern Munich tan an player ropui Thomas Müller chuan minute 85-naah goal thunin an si phurh a sut. Hun tawp dawna an si phurh an sut vangin an mualah chak let beiseina sang tak Bayern hian an nei hman. An si phurh an sut vangin phur viau mah se an phur rei lo thung. Goal an chhuah atanga minute thum hnu lekah Inter Mila n tan Davide Frattesi chuan hma an hruai nawn lehna goal a thun a, German club lian Bayern Munich lakah 2-1 in hnehna an chang a, semi-final an hnaih leh zual ta sauh a ni.