Arsenal leh United an chak

Pathianni zana English Premier League khelhah team lian Arsenal leh Manchester United ten hnehna an chang. Chelsea hnehtu Arsenal in hmahruaitu Liverpool nen an inkar an tizau a. Leicester laka point thum hmu United in hma an sawn hret a, 13-naah an inhlangkai ve thung.
Pahnihnaa awm mek Arsenal hian Emirates Stadium-ah Chelsea an mikhual a, London derby an hmachhawn. Liverpool nen an inkar tizim a, champion beiseina chhawm nung turin Gunners hian an mualah chak an mamawh a. London hmar venga an elpui lian Chelsea lakah chak tumin tan an khawh zui nasa viau bawk. Striker pangngai nei lo mah se striker anga an chhawr Mikel Merino chuan minute 20-naah corner atanga ball kal chu mawi zetin a tauh goal a, hmahruaina goal a thun.
An mualah goal thun hmasa zawk an nih vangin Arsenal game a nghet tha viau a, inrintawkna sang tak nen Chelsea an hmachhawn. Palina luah nghet leh zual tura chak mamawh Chelsea hian an si phurh sut tumin tan an khawh nasa hle. Si nghak David Raya chetsual vangin Blues hian an si phurh an sut teuh hle. Marc Cucurella ball pet kawh zet mai chu David Raya hian a man pial a, a kap karah ball a lut. Vanneihthlak takin ball hi goal sirah a lumchhuak chiah thung a, Arsenal an him. Gunners hian hun tawp dawn hnaihah goal an thun belh teuh viau a, Chelsea si nghak Sanchez chuan pui zetin a lo save hlauh thung a, hun tawp thlengin goal dang a luh belh thei tawh lova, Arsenal chuan Chelsea lakah hnehna changin point thum an hmu.
An elpui lian Chelsea laka an chak hnuin Arsenal hian khelh 29 atangin point 58 an hmu a, pahnihna an luah nghet. Arsenal hian hmahruaitu Liverpool chu point 12 zetin an phak lo mek a. An inkar tizim hret bawk mah se an inthlauhna erawh a la tam viau thung. Arsenal laka tlawm Chelsea hian palina an luah chhunzawm a. London derby-ah point an hlawhchhuah zawh loh vangin an dinhmun erawh a him lo viau thung.
London derby-ah Arsenal an chak lai hian team lian Manchester United chuan King Power Stadium-ah hnehna an lo chang ve bawk. Table hnuai lama awm mek United hian tlahniam thei dinhmuna ding mek Leicester City lakah an khel tha viau a, si thum faiin hnehna an chang. United tan hian Rasmus Højlund chuan minute 28-naah hmahruaina goal a thun. Denmark forward Højlund hian United tan a khelh hnuhnung vawi 21 zetah goal a thun thei lo zawn tawh a. Goal thun lova a awm reng hnuin Foxes lakah goal a thun ve leh ta nge nge a. A goal thun hmang hian si khat faia hmahruai chungin chawlhlawk an hmang.
Chawlhlawk hnu lamah United an khel tha chhunzawm a, goal hnih an thun belh leh. United tan hian Alejandro Garnacho chuan minute 67-naah an goal hnihna a thun a. Captain Bruno Fernandes chuan minute 90-naah goal thunin a tawp a khar zui leh bawk. Leicester City lakah an chak vangin United hian hma lam an pan hret a. An mualah an tlawm vangin Leicester City in tlakhniam an hnaih deuh deuh thung.
Team lian Arsenal leh Manchester United te an chak laiin Tottenham chu an khingpui Fulham lakah 2-0 in an tlawm ve thung. Fulham tan hian Rodrigo Muniz leh Ryan Sessegnon ten an mikhual Tottenham lakah goal khat ve ve an thun