Arsenal leh United an chak lo

October 3, Thawhleh zan khan UEFA Champions League 2023-24 Group Stage khelh chhunzawm a ni a. English club lian Manchester United leh Arsenal te chu an khingpuite hneh lovin an tlawm ve ve. United hi Old Trafford-a an mikhual Galatasaray hneh lovin an tlawm a. Arsenal hi Mikhual an nihna hmunah Lens hneh lovin an tlawm ve thung.
Old Trafford a danglam ta
United khelmual old Trafford hi khelmual ropui, mikhual tan chet harsatna hmun a ni thin. Mikhual tana chet harsatna hmun ni bawk mah se player ten inkhel an hmachhawn chakna hmun a ni thung. An khelmual hmang thiam thin tak United tan thil a danglam a, Old Trafford-ah ngei vawi thum an tlawm zawn ta hial. Thawhleh zana an mikhual Galatasaray an hneh loh vangin United hian Group A-ah point hmu an la nei lova, table mawngphah an ni mek.
Old Trafford-ah Crystal Palace hneh lova tlawm hlimhlawl United hian an mikhual Turkish club lian Galatasaray lakah bul an tan tha a, goal pawh an thun har lo. Nipui bazara an lak luh Rasmus Højlund chuan Marcus Rashford siamsak tha tak chu minute 17-naah a tauh goal a, hmahruaina goal a thun. Hma takah goal an thun vangin United an phur a, an mualah chak ngei tumin an inlan chhunzawm.
Team lian lakah goal chhuah thuai mah se Galatasaray an buai mai lova, na zawkin mualneitu an nawr. Minute 23-na lekah United player hlui Wilfried Zaha chuan fuh zetin a pet goal a, an si phurh a sut. Chawlhlawk hmain goal dang a luh belh thei lova, 1-1 a inhneh-tawk chungin chawlhlawk an hmang.
Chawlhlawk hnu lamah United bawkin bul an tan tha leh a, hmahruai goal thuntu Rasmus Højlund goal hnawl a nih hnu lawkin amah vek hian minute 67-naah inringtawk zetin a pet goal zui leh a, hma an hruai nawn leh. Hnufual zawkah tan nawn leh mah se Turkish club huaisenna a lang nawn leh a, goal an thun leh thuai. Minute 71-naah Kerem Aktürkoglu chuan goal thunin an si phurh a sut a, 2-2 a ni leh ta chiah.
Goal thun tumin team hnihte an innawr chhunzawm a, United vanduai zawkah an tang ta thung. Minute 77-naah midfielder Casemiro hnawhchhuah a ni a, penalty a chawi zui bawk. He penalty hi Mauro Icardi chuan a thelh tlat thung a, hmahruaina goal a thun thei lo. Penalty thelh bawk mah se Icardi hian minute 81-naah inrintawk takin an goal thumna a thun zui leh ta tho a. He goal hi chakpuiin Galatasaray chuan inlehthalna lian an thlentir a, team lian Manchester United an hneh.
Group A-ah vawi hnih khel tawhin Bayern Munich an chak zawn a, point ruk hmuin hma an hruai. United hnehtu Galatasaray in point li hmuin pahnihna an luah a, point la hmu lo United hi table mawngphahah an awm mek. Tarlan tawh angin United an mualah vawi thum ngawt an tlawm zawn ta a, insiamthat an mamawh hle. Ban a tawh mai loh nan manager Erik ten Hag tan hnehna chan thuai a pawimawh leh zual hle tura ngaih a ni.
Lens in Arsenal an lehthal
English Premier League-ah tlawm nei lova kaltluang mek Arsenal chu French Ligue 1 club Lens hmachhawn turin Stade Félix Bollaert-Delélis-ah an lenglut a. Mikhual an nihna hmunah goal thun hmasa zawkah tang mah se goal hnih an chhuah zui a, rin loh takin tlawm zawkah an tang.
Arsenal hi mikhual an nihna hmunah huangtau takin bul an tan a, inkhel tan atanga minute 14-na lekah Gabriel Jesus chuan Bukayo Saka siamsak atangin hmahruaina goal a thun. Hma takah goal an thun vangin Mikel Arteta team te hian inrintawkna sang zawk nen Lens an hmachhawn zui a. Chak ngei tura beisei ni mah se mualneitu Lens er let an tuar ta tlat lo thung.
Team lian zawk lakah goal an chhuah vangin Lens an buai mai lova, goal thun ngei tumin tan an khawh zui chat zawk. Goal an chuah atanga minute 11 hnu lekah goal an thun a. Adrien Thomasson chuan pui zetin a pet goal a, an si phurh a sut. 1-1 a nih hnuin inkhel a hmuhnawm leh zual a, goal thun tumin an innawr zui viau nghe nghe. Innawr tawn nasa viau mah se goal an thun belh thei mai lo ve ve.
Chawlhlawk hnu lamah mualneitu Lens in goal thun ngei tumin thapui an thawh nawn leh a, an hlawhtling ta nge nge. Minute 65-naah Frankowski siasmsak chu an goal khatna siamchhuaktu Elye Wahi chuan a pet goal a, hma an hruai letna goal a thun. Wahi goal thun hi hun tawp thlengin an veng him a. Lens chuan team lian Arsenal lakah point thum hlu tak an hmu zui a a ni.
Arsenal an hneh vangin Lens hian khelh hni atangin point li an hmu a, Group hmahruaitu an ni. Arsenal hi pahnihna an ni ve mek thung.