Arsenal pan tur Viktor Gyokeres

An thawm a reh vang vang a, an indawrna a tlawlh fel emaw tih hnuah thu thar a awm thut a, Arsenal chuan Sporting striker Viktor Gyokeres an la lut thei tep tawh. Gunners hian Gyokeres hi an la lut thuai tura ngaih a ni.
Arsenal chuan tunlaia striker goal thun thei ber pawl Viktor Gyokeres hi club zawm turin an hmin tawh a, kum nga daih contract ziak turin mimal inremna an neihpui thei tawh. Mimal inremna an neihpui hnuin 70m euros (£60m) senga lak tumin Sporting Lisbon an dawr. Portugal club lian Sporting hian Arsenal dawrna hi tlem an ti a, an hnar. Man leh mualah an inrem theih loh vangin Gunners hian dawr chhunzawm an tum lo niin thu a thang hman hial.
Sporting tan vawi 102 khel a, goal 97 zet thuntu Gyokeres hian inelna lian zawk hmachhawn turin Arsenal pan a chak hle. Arsenal zawm a chak em vangin Manchester United sawmna pawh a hnar hial. Arsenal zawm a chak em vangin kawhmawh a bawl hial a, pre-season training nei turin a kir duh rih lo. Chawlh a hman zawh hnu pawha a lut duh loh vangin Sporting CP chuan Gyokeres lakah hremna an lekkawh ngei tur thu an sawi a, sum tam tak chawitir an tum. A chungah hremna na tak lek an tum laiin Arsenal in an dawr nawn leh a, inremna an nei thei ta niin football bazar a thil hre dik thei tak, mi rin hlawh em em Fabrizio Romano chuan a sawi a. Thuthar thehdarhtu rintlak tak BBC Sport huang pawhin Arsenal in Gyokeres an dawr fel tep tawh niin a tarlang ve bawk.
Trophy la a, ‘next season’ an tih fo nghahchhuah tum Arsenal hian Gyokeres an ngamna zat an tipung hret a, 73.5m euros (£63.5m) senga lak tumin Sporting an dawr nawn leh. Sporting lam pawhin Arsenal dawrna an pawm fel thei ta niin tarlan a ni. Gunners hian Gyokeres manah £55m vel bawr an pe phawt ang a, a khelh tha dan a zirin £8.6m thleng an belh leh dawn. Club pahnih ten a thuphunga inremna an neih theih tak vangin Gyokeres hi Arsenal player a ni thuai dawn a, London club hian medical test an neih hun tur pawh an ruahman tawh a. Tunkar tawpa Asian tour neih turah Arsenal team a zawm hman dawn niin BBC chuan a tarlang.
Arsenal striker thar ni mai tura ngaih Viktor Gyokeres hian season liam ta khan Sporting tan vawi 52 khelin goal 54 zet a thun. Portugal tualchhung league-a a chetthat rualin Champions League lamah pawh a che chhe lo viau bawk. Champion chaka tuihal Arsenal hian season liam ta khan striker pangngai tak an nei lova, Kai Havertz, Gabrial Jesus leh Mikel Merino te an chhawr mai thin. Striker tha pangngai tak Gyokeres an la lut thei a nih chuan an hlauhawm leh zual hle tura ngaih a ni.
London club lian Arsenal hian an squad thuamchak hna an thawk mek a, player pathum; Martin Zubimendi, Brentford captain Christian Norgaard leh goalkeeper Kepa Arrizabalaga te a la lut tawh a. Viktor Gyokeres an la lut ngei dawn niin a lang a, hetihlai hian Chelsea leh England winger Noni Madueke pawh an dawr fel tep tawh niin tarlan a ni bawk. Chelsea atanga Madueke an la lut theih a nih pawhin Gunners hian Real Madrid leh Brazil forward Rodrigo lak tumin an ngaihven zui zel dawn tho bawk.