Arsenal tan champion a hlat belh

Inrinni zan khan English Premier League 2024-25 khelh chhunzawm a ni a, pahnihnaa awm mek Arsenal an chak zo lo. Arsenal an chak zawh loh vangin Liverpool in champion an hnaih leh zual sawta ngaih a ni. Inrinni zana inkhel dangah pathumnaa awm mek Nottingham Forrest pawh Aston Villa hneh lovin an tlawm a. Red card pathum ngawt phawrhna inkhelhah Crystal Palace in hnehna an chang ve thung.
Everton 1-1 Arsenal
Liverpool champion hun tur chelh khawtlai a, an inkar tizim leh zual tura chak mamawh Arsenal chu Liverpool hmelma lian Everton hmachhawn turin Goodison Park-ah an lenglut. Gunners hian mikhual an nihna hmunah goal thun hmasa bawk mah se hnehna an chang zo lo tlat thung.
Goodison Park-a lenglut Arsenal tan hian Leandro Trossard chuan minute 34-naah hmahruaina goal a thun a, 1-0 a hmahruai chungin chawlhlawk an hmang.
Hmahruai chungin chawlhlawk hmang mah se Arsenal hi chawlhlawk hnu lamah an chesual thuai thung a, penalty an chawi thuai. Second half tan atanga minute li hnu lekah penalty an hlawhchhuah chu Everton tan Iliman Ndiaye chuan harsatna tawk lovin a pet goal a, Arsenal laka an si phurh a sut. Iliman Ndiaye goal thun hnu hian inkhel hmuhnawm zui viaua mah se goal dang a luh belh thei tawh lova, 1-1 in an inthathen zui ta a ni.
Everton lakah an chak zawh loh vangin Arsenal tan champion a harsa leh zual sauha ngaih a ni. Table-a hmahruai mektu Liverpool chuan Pathianni zan khan Mimualah Fulham an hmachhawn. Fulham lakah an chak a nih chuan Arsenal nen an inkarah point 15 zet a tla zep tawh dawn a. Reds hian champion an hnaih leh zual sauh dawn tihna a ni ang.
Forrest pawh an tlawm
Table-ah pahnihna luah mektu Arsenal an chak zawh loh lai hian pathumnaa awm mek Nottingham Forrest pawh an lenluhna mual Villa Park-ah Aston Villa hneh lovin an tlawm ve bawk. EPL-ah top 4 huang inchuhna boruak a lian chho viau dawn a. Pathumna leh palina nih tumin an inel nasa zual dawn. Team lianin an um zel laia an tlawm hi Nottingham Forrest in an tuar zui viau mai thei a ni.
Top 4 huangah inhlankai tuma tan khawh Aston Villa hian an mualah bul an tan tha viau a, minute 15 chhungin goal hnih an thun hman der. Villa tan hian Morgan Rogers chuan inkhel tan atanga minute 13-na lekah hmahruaina goal a thun nghal. Hma takah goal an thun vangin an phur viau a. Forrest a talbuai ve thung. An mikhualte an talbuai lai chunin Villa hian goal an thun belh zui leh zat a, Donyell Malen chuan minute 15-naah an goal hnihna thunin, an hmahruaina a tizau a. 2-0 a hmahruai chungin chawlhlawk an hmang.
Inkhel a rei a, Nottingham Forrest an insiamtha chho zel. Tlawm pumpelh tuma tan khawh Forrest tan hian minute 57-naah Jota Silva chuan goal thunin an si phurh a sut. An si phurh an sut then vangin phur viau mah se hun tawp thlengin goal dang an thun belh thei tawh lova, Aston Villa lakah hreh tak chungin an tlawm zui ta a ni.
Nottingham Forrest lakah an chak vangin Aston Villa hian khelh 31 atangin point 51 an hmu a, paruknaah an inhlangkai. Palinaa awm mek Chelsea nen point khat chauhin an inthlau mek a, top 4 huang luah phak beiseina sang zawk an nei thar. Villa laka tlawm Nottingham Forrest hian pathumna an luah chhunzawm a, Chelsea an chak a nih chuan an inkar a zim hret dawn thung.
Inrinni zana inkhel dang, inkhel hmuhnawm tak; red card pathum ngawt phawrhna inkhelah tunhnaia khel tha Crsytal Palace chuan 2-1 in an mikhual Brighton an hneh.
Palace tan hian Morgan Rogers leh Donyell Malen ten goal an thun a, Eddie Nketiah leh Marc Guéhi te hnawhchhuah an ni a. Brighton tan Welback-a’n goal a thun a, Jan Paul van Hecke hnawhchhuah a ni ve thung.