By Hruaia Pa
-- Advertisement --
Haleluiah Haleluiah
Lalpan thil ropui min tihsak e
Tiin an zai dual dual a. Lawm vanga au khel rawi rawi an awm a, lawm vanga mittui luang zawih zawih pawh hmuh tur an awm. Mizote thinlungah lawmna tuipui a fawn a, a kuang a fawn liam hial a ni. Chuti taka mipui tam tak lawm vanga an zai rual dual dual nachhan chu Indian I League-ah Aizawl FC an champion vang a ni.
Kum 1996 atanga khan football-a India tualchhung league lian ber National Football League khelh tan a ni a. National Football League tih hi kum 2007 atang khan ‘I-League’ tiin thlak a ni. Hun rei tak chhung chu he I-League hi state dang club te inelna turah ngaiin, Mizo club an tel phak kan ring ngai lo. Mizo ten player tha tak tak neiin, I League team liana khel awm ve nawk mah se Mizo team ngeiin I League an hmachhawn ve erawh rin harsa tak a ni a. I League club nei tura sen so a hautak tham em vangin sum leh pai ang zawnga chhut pawhin I League hi Mizo club te telna atan suahtuah ngam pawh a ni meuh lo a. Zawlnei derte zingah meuh pawh I League-ah Mizo club ang champion ring an awm kherin a rinawm loh.
Kum 2012 atangin Mizoram tualchhung club te inelna ‘Mizoram Premier League (MPL) mumal takin khelh tan a ni a. Mizo player leh Mizoram club ten MPL hi hma an sawnpui hle. MPL chhawr tangkai ber zingah kum 1984 a din Aizawl FC hi an tel. Kum 2015 khan Mizo tea pahnih; Aizawl FC leh Chanmari FC ten I League khel tur zawnna I League 2nd Division final an thleng nawlh a. Aizawl derby-ah Aizawl FC hian 4-2 in Chanmari FC an hneh a, India tualchhunga football club te inelna lian leh ropui ber I League khel turin an tling.
Aizawl FC in I League an khelh tan lai hian Indian Super League (ISL) a piang thawh naa hetih hun lai hi chuan I League hi Indian top flight league a la ni a. I League leh ISL hi a ruala khelh a la ni loh vangin India rama club ropui leh hlun ber ber te I League-ah hian an tel a. India player tha ber ber ten I League an la khel bawk. Chu mai a ni lo, foreign player tha tak takten I League an khel bawk a. Hetih hun lai hian I League hian ngaihhlut a la hlawh hle hle. Aizawl FC in I League an khel ve tak vangin India rama club ropui takte inkhel turin Aizawl an lo kal a, player tha tak takte Aizawl-ah an rawn inkhel ve ta sup sup mai chu football ngaina Mizote tan chuan a hlu lutuk a, mumang a ang thei rum rum.
I League-a an season khatnaah AFC an chetha nghal mai lova, pariatna an ni pha tawk. Table mawngphah ni lo mah se Aizawl FC hi tlahniam tur an ni a. Tlahniam em lovin I League an khel chhunzawm a. Kum 2016-2017 ah meuh chuan thil mak thlengin, Aizawl FC hi an champion ta hial.
April 22m 2017 khan table chung bera awm Aizawl FC hian an hnuai chiaha awm Mohun Bagan chu Rajiv Ghandi Stadium, Mualpuiah an mikhual a. Anni team hnih hi point 33 ve ve hmu mek an n a, an inkhela chak zawk zawk hian champion theihna hun tha tak an neih zui dawn vangin he inkhel hian ngaihven a hlawh hle. RG Stadium-a ‘Romin relsak ang che’ tih hla ropui sak thum hluah hluah karah Aizawl FC hian minute 83-naa Zohmingliana Ralte goal thun hmangin hnehna hlu tak an chang a. RG Stadium chu lawm vangin a khur a ni ber mai.
An elpui lian Mohun Bagan an hneh nawlh vangin Aizawl FC hian champion an hnaih a, champion turin Shilong club lian Shilong Lajong lakah tlawm an pumpelh a, point khat tal an hlawhchhuah a ngai. Shilong Lajong leh Aizawl FC te inkhel en tur hian Mizo mipui tam takin Shillong an pan khawm a, Polo Ground a khelmual ropui ber Jawaharlal Nehru Stadium-ah football ngaina Mizo mipui an insul pel zut zut a. Stadium chhunga Mizo mipui tam tak an zai thum hluah hluah bawk.
April 30, 2017 – Pathianni tlaia ni ta eng mawi tak chu Shillong a khelmual ropui Jawaharlal Nehru Stadium chu a chhun hnim ruih a. Chu khelmual chhungah chuan Aizawl FC champion lawm a, Mizoramah Sahrang lu hawn ngei tum Mizo mipui an thu tlim hmur a. Champion lawm chakna zauthau leh sahawk an nih rualin, champion loh hlau a khur ru der der an ni nawk hlawm. Chu khelmualah eng kulh maiah chuan AFC in bul an tan tha lova, goal chhuah hmasa zawkah an tang. Lajong player pawimawh Asier Pierrick Dipanda Dicka chuan minute kuana lekah a pet goal ta mai a. He goal vang hian Lajong leh Mohun Bagan tan tute lawmna au ri chuan India ram zau pui mai hi a thangkhawk kual rawih rawih. Aizawl FC an chak loh lai hian lehlamah Mohung Bagan leh Chennai City te an lo inhnehtawk ve mek bawk a. Aizawl FC nge champion ang Mohun Bagan zawk tih inrinsiakna thawm a ringin, a ngaihnawm hle.
Champion tura an khingpuite nen inhnehtawk tal mamawh Aizawl FC hian William Lalnunfela chuan minute 67-naah goal thunin, an si phurh a sut ta mai a. He goal zet hi chuan India ram a sawi nghing chiang hle. Hun tawp a hnai a, ‘Lalpa’n thil ropui min tihsak e’ tih thawm a rin tulh tulh. Chutihlai chuan Shillong Lajong in goal thun theihna hun remchang zet mai an nei a, an pet goal ngei tura ngaih a nih tawh laiin Pathian kutin Aizawl FC a chhanhim a, goal chhuah belh em lovin, champion nana an mamawh point chu an thawkchhuak ta. Tichuan, Aizawl FC chu hmarchhar team zinga a hmasa ber ni turin I League-ah an champion ta a ni.
I League-ah Aizawl FC champion lawm a:
Halleluiah Halleluiah
Lalpan thil ropui min tihsak e
Tawtawrawt leh phenglawng rite nen
Darbenthek ri thum leh fiakin
Perhkhuang tingtang chi hrang hrang nen
Khuangte nen lamin kan fak zel dawn
tia zawi rual dual dual khan Mizote Pathian Khuanu ropuizia min hmuh nawn tir a. Chumi rual chuan football tan Robert Romawia Royte inpekne thuk tak leh a insenso nasatzia ka hmu tel bawk!
I League-ah Aizawl FC an champion vanga ka lawmna mittui far a. Mizo player club leh player te hlawhtlinna vangin far nawn fo se ka va’n ti em!