ASF avangin vawk sing 2 chuang thi ta

Vawk pul hri – African Swine Fever avangin Mizoramah kumin chhungin vawk sing hnih chuang an thi ta a, vawk thi tawh hlutna hi cheng nuai 2500 chuang niin, sawrkarin ‘disaster’ ah a la puang rih lo thung.
2024 July 24 thleng khan ASF thihpui vawk 7307 an awm tawh a; ASF kai nia ngaih vawk 13543 tih hlum/ suat an ni tawh bawk. Heti hian ASF leng thawh thumna thleng mekah hian vawk 20850 in an thih phah tawh a ni.
Mizoramah ASF hi nasa deuhin tum hnih a leng tawh a. Kum 2021 ah a vawikhatna atan he natna hi lengin, vawk thihpui 33417 an awm a, he natna kai ngei nia hriat avanga vawk suat/ tih hlum 12568 an awm. Kum 2022 khan a thawh hnihna lengin he natna thihpui vawk 12568 leh suat 11594 an awm. Kum hnih chhunga ASF vanga vawk thi hi 70147 a ni.
Kum 2023 khan kumtawp lamah ASF hi a leng leh a; vawk 1039-in thihpuiin 928 suat a ni. Nikuma leng hi a thawh thumna anga chhiar a ni lem lo thung a; a kar a inhlat loh avangin a thawh thumna bultanna anga ngaih theih a ni lek lek zawk nia sawi a ni.
Kumin ami hi a thawh thumnaa ngaih a ni a, he hri thihpui leh suat zatah chuan a hma lama thi zat nen la intam hleih lo mah se, tunah a la leng mek a; a tuam zau zel bawk a, Mizorama district 9 tuam tawhin, Siaha leh Lawngtlai district tih lohah chuan a lut vek tawh.
Hetiang a nih mek lai hian, ASF leng hi ‘state disaster’ ah puan a la ni loa, sawrkar laipui atang pawhin chhawmdawl kawngah ruahmanna thar hriat a la awm lo nia thu dawn a ni.