ASF la thlen lohna Kolasib inralring

Vawk natna, African Swine Fever-in a la luhchilh ve rih loh Kolasib district chu he hri laka invenna kalpui dan tur leh vawk thi an awma hmalak dan tur relin District Level Coordination Committee on Africa Swine Fever chu an chairman, bawrhsap John LT Sanga hoin an thukhawm.
District Veterinary & Animal Husbandry officer Dr Lalsanglien Ralsun sawi danin, ASF vangin December 2021 thleng khan Kolasib district-ah vawk 168 an thi a; ASF thawh hnihna – 2022 November 31 thleng khan vawk 2575 an thi. ASF hrilenna hmuna puan, infected area-a vawk la damte suat (cull) an nihin zangnadawmna dilsak thin an ni.
Thutkhawmah hian kumin chhungin ASF hri vangin Kolasib district-ah vawk thi an la hmu lo tih DVO hian a sawi a. Mizoram khaw hrang hrangah he hri hi a darh mek avangin fimkhur taka hma lak ran a tul tih an sawi. Ramria check gate-ah vawk leh vawksa atanga thil siam lakluh a nih loh nana endikna kalpui dan tur, vawk dam lo a awma rang taka thuneitute hriattir an nih theih dan tur leh ran thi sawngbawl dan tur sawi a ni. Hri vang a thi vawk a awmin, uluk tak a phum a nih theih nan a hmunhma felfai tak ruahman a tul thu sawi a ni bawk.