TB awm lohna khua neih tam lawm

Chief Medical Officer office Lunglei buatsaihin Nilaini khan World TB Day 2024 leh TB Free Village lawm a ni.
Hmanpuitu district bawrhsap Ramdinliani chuan undivided Lunglei district (Lunglei & Hnahthial) chu a area ang zawng chuan Mizorama district zau ber a nih avangin, inkalpawhna leh hriselna kawngah hma lak a harsa bik a. District dang nen khaikhin chi pawh a nih loh laia TB Free Village nei tam ber district an ni thei chu thawktute inpekna leh khawtlang hruaitute hmalakna rah a ni tih a sawi.
Kum 2025-ah chuan India ramin TB umbo tumin theihtawp a chhuah mek tih a sawi. TB natna vei tam ber chu thalai an nih thin avangin chhungkua leh khawtlangah nghawng a neih phah hle tih a sawi a, thalai zawkten TB natna an vei avangin hnathawk hleithei loin an awm a, chhungkua leh ram economy-ah nghawng a nei thin a. Hei vang hianTB natna veite an damchhuah ngei ngei theihna turin sawrkarin a enkawlna kawngah uluk takin ruahmanna kalpui tur a siam tih a sawi bawk.
Lunglei District TB officer Dr. K. Lalhmachhuana report danin, sawrkar laipuia Ministry of Health & Family Welfare chuan India ramah kum 2025-ah TB natna umbo a nih theih nan state tinah TB Free Village kalpui tura a tih angin, Mizoramah pawh kalpui a ni a. Kum 2023 khan Mizoramah TB Free Village puang thei district pathum awmin, Lunglei district chu a puang tam thei ber a ni a; khaw 18 TB Free Village-ah puan an ni.
Kum 2023 khan Lunglei district-ah TB vei 150 hmuhchhuah niin, an zinga 15 chu TB HIV an ni a; mi 134 enkawl dam tawh niin, mi 5-in an thihpui. Mi 11 enkawl mek an ni. Kum 2024 chhung hian Lunglei district-ah TB vei 62 hmuhchhuah an ni tawh a, an zinga 4 chu TB HIV an ni. TB vei hmuhchhuah tam ber hi nikum khan kum 20-29 inkar an ni a, kuminah chuan kum 30-39 inkar an ni.
Lunglei district-a TB free village chu – Chhipphir, Bualpui ‘V’, Sekhum, Mualthuam North, Sertlangpui, Serte, Thuampui, Vaisam, Chithar, Thangte, Sairep, Belthei, Tarpho, Thualthu, Bualte, Kawlhawk, Zotuitlang, Ralvawng an ni.