ASF vanga vawk thi 69411Vbch. 900+ hu chan tawh

On Aug 5, 2025 3 0

ASF vanga vawk thi 69411
Vbch. 900+ hu chan tawh
Mizoramah kum 2021-a vawk pul hri – African Swine Fever (ASF) a len hnu ah tun thlengin vawk 69411 an thi tawh a, he hri kai 52194 suat an ni tawh a, vawk thi zat hi cheng vaibelchhe 900 chuang hu a ni tawha chhut a ni.
Larsap Gen. Vijay Kumar Singh (Retd) chuan AH & Vety secretary Lalsangliana leh hotu dang chu Thawhtanni khan Raj Bhavan-ah kawmin, ASF-a Mizoram dinhmun bakah department hmalakna leh hmachhawp a sawipui.
Powerpoint presentation-a tarlan danin, 2021 March 21 khan Lungsen khuaah Mizorama ASF case hmasa ber report a ni a. 2025 August 3 thleng khan ASF vangin vawk 69411 an thi tawh. Hrileng darh zel tur vennana suat (culled) 52194 a awm a. Chhungkua 11424 nghawngin, cheng vaibelchhe 982.16 hu vel chan tawh anga chhut a ni. Sawrkar laipuia Assistant to State for Control of Animal Disease leh state sawrkar kaltlangin vawk suat compensation cheng nuai 1451.915 sem a ni tawh a, DM&R department kaltlangin vawk thi compensation nuai 477.08 pek a ni tawh bawk.
Thutkhawmah hian AH& Vety department hotute chuan Mizoram chu ASF-in a chenchilh tlat tawh avangin, khuahkhirh turin hri danna (vaccination) kalpui chu hmalak theihna awmchhun a ni tih larsap hi hrilhin, tun dinhmunah India ramah ASF vaccine a awm loh avangin a siam chhuaktu Vietnam atanga lakluh dan a awm em, tih ngaihtuah a tul a. Sawrkar laipui atanga fund hmuh kawngah harsatna a awm avanga compensation duh anga pek theih a ni lo tih an thlen.
Larsap chuan ASF-in Mizoramah kum 4 lai harsatna a thlen tawh avanga sum leh pai nasa taka chan a ni leh mipui khawsak a nghawng nasa chu veiawm a tih thu a sawi a. Vawk hrileng thunun tura AH& Vety department hmalakna, hemi kawnga harsatna tawh leh rawtna an neih hriat a duh avanga thutkhawm hi ko a ni, tiin, ASF avanga harsatna thlengte khuahkhirh turin department mal hmalakna a tawk loa, line department hrang hrang leh mipui nen thawhhona tha neih a ngai tih a sawi. Harsatna leh rawtna an thlen chu theihtawp chhuaha bawhzui sak a tum tih a sawi bawk.
Thutkhawmah hian ASF chungchang inzirtirna zau zawk kalpui leh thu pawimawh inhrilhhriat zung zung dan tur, line department dangte nen tanrual dan tur, vawk thi sawngbawl dan bakah pawimawh dang sawiho a ni.