ASF vanga vawk thi zat pung chak

Mizoramah African Swine Fever (ASF) a leng leh tawh a, he hri vanga vawk thi zat a pung chak hle. Mahse vanneihthlak takin he hri finfiahna hmun hi a pung chak lem lo rih.
AH&Vety department report-ah March ni 21 kha kumina ASF vanga vawk thi a awm hmasak ber ni a ni a, hemi ni hian vawk 222 a thi a, April ni 11-a an report-ah chuan vawk thi tawh zawng zawng hi 1712 a ni tawh.
April ni 11-ah hian vawk 130 a thi a, kumina vawk thi tawh zat hi 1712, vawk tihhlum/suat (cull) tawh zat chu 559 tiin an report-ah tarlan a ni.
A tirah Mamit district leh Lawngtlai district-ahte ASF hi finfiah a ni a, Siaha district leh Lunglei district-ahte finfiah belh a ni tawh.
April ni 11 thlengin district pali-ah ASF hi finfiah a ni tawh a, khua leh veng 41-ah finfiah a ni tawh. Siaha district leh Lawngtlai district te’n an tuar nasa a, Siaha district-ah hian vawk 794 a thi tawh a, vawk 336 tihhlum a ni tawh. Lawngtlai district-ah vawk 808 a thi tawh a, vawk 174 tihhlum a ni tawh.
Siaha district-ah hian khua leh veng 25-ah ASF hi hmuh a ni tawh a, Lawngtlai district-ah khua leh veng 13-ah hmuh a ni tawh.
ASF hi 2021-ah Mizoramah finfiah a ni a, chumi hnu chuan Mizoramah he hri hi kum tin a la leng.