ASF vangin cheng vaibelchhe 700 chuang chan tawh
Kum hmasa lam atangin African Swine Fever (ASF) vangin Mizoramin harsatna a tawk a, he hrileng vang hian vawk a sing tel an thi tawh.
AH&Vety department-in an chhut danin, kumin July ni 15 thlenga ASF vanga Mizoramin vawk a chan tawh zawng zawng hi cheng vaibelchhe 707.96 man tur a ni. July ni 15 hnuah hian vawk engemaw zat a thi leh tawh bawk.
ASF hi 2021-ah Mizoramah hmuh a ni a, hemi hnu hian kum tin a la leng. He hri vanga vawk thi tawh leh vawk tihhlum tawh hi a vaiin cheng vaibelchhe 707.96 man turah an chhut a ni.
AH&Vety department-in an chhinchhiah danin, 2021-ah Mizoramin ASF vangin vawk 45985 a chan a, a vaiin cheng vaibelchhe 334.14 man turah an chhut. 2022-ah vawk 24481 Mizoramin a chan leh a, cheng vaibelchhe 210.32 man tura chhut a ni. 2023-ah khan hri hi a nasa ta lo deuh a, hemi kuma Mizoramin vawk a chan zat chu 2119 niin, cheng vaibelchhe 15.77 man tura chhut a ni. Kuminah July ni 15 thleng khan vawk 17381 chan a ni tawh a, cheng vaibelchhe 147.73 man tura chhut a ni.
2021 atanga kumin July ni 15 thlengin vawk hi hri vangin 53352 a thi tawh a, he natna vei vawk tihhlum (cull) tawh zat hi 36614 niin, Mizoramin ASF vanga vawk a chan tawh zawng zawng chu 89966 a ni.
2021-ah khan khaw 272-ah ASF hi hmuh a ni a, 2022-ah khaw 149-ah, 2023-ah khaw 36-ah, 2024-ah khaw 192-ah hmuh a ni tawh.
He hrileng hian chhungkaw 22608 a nghawng tawh tiin an chhut bawk.
ASF vanga vawk chan zat
Kum Vawk thi Suat Tuartu
chhungkua
2021 33417 12568 12160
2022 12795 11686 6439
2023 1139 980 419
2024
(July 15 thleng) 6001 11380 3602