ASF vangin vawk thi leh

African Swine Fever (ASF) hriin kum nga chhung Mizoram a tibuai tawh a, kuminah pawh hmun \henkhatah hri hi hmuh a ni leh tawh. Mahse vanneihthlak takin tunah rih chuan a darh nasa lo.Tun hnaiah Serchhip khawpuiah ASF hi hmuh a ni a, AH&Vety department-in an chhinchhiah danin, he hri vang hian Serchhipah hian vawk 38 a thi tawh. He hri vanga vawk tihhlum ngai chu a la awm lo.
AH&Vety department atanga thu dawn danin, thlasik laiin he hri hi a zia thin a, January-ah khan vawk thi a awm. Kumina he hri vanga vawk thi hmasa ber chu January ni 16-a mi a ni a, Aizawla mi a ni. Mahse he hri hi a darh zui lo a, tun thlaah Serchhip lamah hmuh a ni leh ta a ni.
Kum liam taah khan Mizoram hmun hrang hrangah ASF hi a leng a, he hri vanga 2025 chhunga vawk thi hnuhnung ber chu December ni 10-a mi a ni. A reh vang vang hnuah kum tharah he hri hi hmuh a ni leh a, mahse a darh nasa rih lo.
Department lam chuan kum dangah pawh March velah hmuh a ni thin tih an sawi a, 2025-ah pawh khan thlasik laia a zia hnuah March ni 20-ah vawk a thi a, he hi 2025-a ASF vanga vawk thih tan ni a ni.
Mizoram thenawm state thenkhatah chuan thlasik lai pawh khan ASF hi a leng tho tih an sawi a,
ASF hi Mizoramah 2021-ah finfiah a ni a, chumi hnu chuan he hri hi kum tin a la leng. Kum liam taah khan a hma kumte ngaihtuahin a nasa lo a, vawk 9711 a thih bakah vawk 3620 tihhlum (cull) a ni.