ASF vangin vawk thi leh nual

African Swine Fever (ASF) hrileng a zia deuh deuh laiin hmun thenkhatah a awm thar leh a, he hri hi a nasa tia sawi tur ni lo mah se hmun thenkhatah hmuh thar a nih avangin vawk thi zat pawh a pung leh viau.AH&Vety department-in an chhinchhiah danin, September ni 4 thleng khan ASF vang hian Mizoramah vawk 737 a thi a, ni 8-ah chuan vawk thi zat hi 805 a tling tawh. Ni 4 hnuah vawk 68 a thih belh tihna a ni a, hei hi tun hnaia hri luh tharnaah vawk a thih nual vang a ni tih thu dawn a ni.
AH&Vety department hotute sawi danin, hmun dangah a zia laiin tun hnaiah Khawzawl district-a Kawlkulh-ah ASF hi a lut ve leh a, Kawlkulh-ah hian hun rei vak lo chhungin vawk a thi nual. ASF finfiahna thar ber Kawlkulh-ah hian hun rei lo te chhungin vawk 256 a thi tawh a, vawk 112 an tihlum/suat tawh bawk.
Kawlkulh hi ASF an hmuhna a la rei lo chungin khua leh veng mala lak pawhin a tuar nasa pawl an ni nghal titih a, anni aia vawk chan nasa chu Lunglei district-a Pukpui khua chauh an ni; Pukpui-ah hian vawk 257 a thi tawh a, vawk 109 an suat tawh.
ASF hrileng thawh thumna tuar hmasatu Champhai district-ah hrileng a zia hnuah tun hnaiah khaw thenkhatah hri hi hmuh a ni leh a, Hmunhmeltha, Bulfekzawl leh Lianpui khuaahte hmuh a ni leh. Hei vang hian Champhai district-ah pawh vawk thi a awm leh a, mahse Kawlkulh te anga nasa chu a ni rih lo.
Hri a awm tih finfiahna, Kolasib, Aizawl leh Mamit district-ahte chuan a zia rih. Tun hnaia a hluarna Khawzawl district-ah pawh Kawlkulh bak khaw dangah vawk thi report a awm rih lo a, hei vang hian AH&Vety department lam chuan ASF hi Mizoramah a hluar tia sawi tur chu niin an hre rih lo.