Asian Cup 2027 qualifiers khel tur India squad hmasaah Mizo pahnih
Indian football head coach Manolo Marquez chuan thla thara AFC Asian Cup 2027 Final Round qualifiers khel tur squad hmasa (28-member probables) a puang a, la thlitfim leh tur India squad-ah hian Mizo player pahnih forward Lallianzuala Chhangte leh midfielder Lalengmawia Ralte an tel.
India boss hian tunhnaia India team-a kirleh veteran striker Sunil Chhetri pawh probable squad-ah hian telh lehin, kum 40 mi ni tawh mah se India tlarhma luah turin Delhi tlangval hi a la hnar phal lo!
Kum 10 tel hnih ngawt national team-a a khelh hnuah Chhetri hian international football chawlhsan zet mah se ramin a mamawhna chhangin a kirleh a, friendly match-a Maldives an hmachhawn tum leh 2027 AFC Asian Cup qualifiers-a Bangladesh an sut tumin ram tan a inkhel leh a, national team kiangah training a la chhunzawm zel a ni.
Nilainia All India Football Federation thuchhuah chuan squad hmasaa kohte hi May ni 18 khian Kolkata khuaah an in report ang a, June thla FIFA International window laiin ni 10 chhung he khawpuiah hian training an kalpui dawn a ni.
India hi AFC Asian Cup 2027 Final Round qualifiers Group C-ah Bangladesh, Hong Kong, China leh Singapore-te nen awm hoin, group match-te hi home-and-away round-robin format-a khelh tur a ni.
June ni 10 khi India match hmasaber khelh hun niin, Kai Tak Sports Park, Kowloon City-ah Hong Kong luhkhung chungin campaign an tan ang a, tunhnaia Pakistan tana India hmarchhak pumhmawm chungchang sawichhuaktu thenawm Bangladesh nen hmarchhak khawpui lar Shillong-ah an innuai bawk ang.
AIFF thuchhuah chuan Asian Cup qualifier-a Hong Kong an hmachhawn tur inbuatsaihna pakhat atan Blue Tigers chuan Kolkata khawpuiah 10-day training camp an lut ang a, chu mi hnuah June ni 4 FIFA international friendly match-a Thailand-a luhkhung turin Bangkok an pan dawn a ni.
Bangkok atang hian India-a kir tawh loin Asian Cup qualifier-a an tum tur pakhat Hong Kong an pan ding nghal dawn tih AIFF thuchhuah chuan a tarlang tel.
-- Advertisement --
Kolkata camp lut tura kohte
Goalkeepers: Hrithik Tiwari, Vishal Kaith, Gurmeet Singh Chahal, Amrinder Singh.
Defenders: Naorem Roshan Singh, Rahul Bheke, Konsham Chinglensana Singh, Anwar Ali, Thangjam Boris Singh, Sandesh Jhingan, Asish Rai, Subhasish Bose, Mehtab Singh, Tekcham Abhishek Singh, Nikhil Prabhu.
Midfielders: Suresh Singh Wangjam, Naorem Mahesh Singh, Ayush Dev Chhetri, Udanta Singh Kumam, Lalengmawia Ralte, Liston Colaco, Ashique Kuruniyan, Brandon Fernandes.
Forwards: Sunil Chhetri, Irfan Yadwad, Manvir Singh, Suhail Ahmad Bhat, Lallianzuala Chhangte.
Head coach: Manolo Márquez.