Asian Games-ah Afghan hmeichhiate inlan dawn

Asian Games-ah Afghan hmeichhiate inlan dawn
Hmeichiate rahbehna ram ni thin Afghanistan hmeichhe infiammi 17 zetin tunthla tawp lam hian China rama Asian Games-ah an ram ai an awh dawn tih Afghanistan Olympic committee thuchhuah chuan a tarlang.
Kum 2021 August thlaa Taliban hoin khawthlang ram sipaite inthiarfihlim hnua Afghanistan an awplet leh tak hnu khan he rama hmeichhe infiamna chu tihtawp a ni leh ta rih a, an rama hmeichhe langsar ber berte chu ram pawnah an tlanchhe hial a ni.
Taliban sawrkar hian hmeichhiate zalenna an rahbeh rual hian an hmeichhe naupangte’n sikula zirna an tem ve pawh a phalrai lo leh a, chutianga hmeichhiate’n hun thim an hmachhawn mek lai chuan an ram Olympic committee chuan chanchin lawmawm an puang ta a ni.
Hei hi International Olympic Committee (IOC) lamin nikum December thlaa Afghanistan rama roreltu Taliban-ho an vau vangte pawh kha niin a lang a, an ramin 2024 Paris Games-a infiammi an tir ve duh dawn a nih chuan Afghan hmeichhia leh hmeichhe naupangte chu thlamuang taka infiamna kawng zawh an phalsak tur a ni tiin an vau a, Asian Games lama hmeichhe infiammi 17 lai tirh an tum thu an puang ve ta nge nge a ni.
Thawhlehni khan Afghanistan rama an National Olympic Committee chuan thuchhuah siamin, “Afghanistan chuan Asian Games stage-a hmeichhe infiammi tam thei ang ber tirh a tum avangin he ram hi a eng mawi zual zel dawn a ni.
“NOC Afghanistan chuan women athlete namai lo tak tak 17-te chu infiamna discipline pathum – athletics, cycling leh volleyball khel turin China ramah hian a tir dawn a ni,” tiin.
Afghan NOC thuchhuah hian hmeichhe infiammite tana scholarship chi thum an buatsaih thu leh chu chuan Paris 2024 Olympics an thlen theihna turin kawng a sial dawn tih an tarlang tel.
Kumin Asian Games hi Hangzhou khawpuiah September ni 23 atanga October ni 8 chhunga nghah tur a ni.