Asian TT Championship: India women team kutah bronze

Asian TT Championship:
India women team kutah bronze
Astana khawpuia Asian Table Tennis Championships khelh mek semi-final lamah Indian women’s team chu Nilaini khan Japan lakah 1-3-in an tlawm a, he championship chanchina a vawikhatna atan bronze medal an hlawhchhuak.
India women’s team hi second-seeded South Korea lakah khawng zetin an inlan zo chiah a, foreign coach Massimo Costantini tel loin No. 4-seeded Japan lakah an duap zui ta tlat a, rin loh taka top-ranked Indian woman Sreeja Akula tihte bench lama an dah tlat kha a mak ve pah bawk.
South Korea laka vul Ayhika Mukherjee chuan world number 7 Miwa Harimoto lakah bul a tan fuh ngei mai a, mahse, hun pawimawha a talbuai tuarin a tumpui lakah hian 2-3 (8-11, 11-9, 8-11, 13-11, 7-4)-in a tlawm.
Chutah India chhuanvawr Manika Batra chuan score-a 1-1 ni turin world ranked No. 17 Satsuki Odo lakah 11-6, 11-5, 11-8 hnehna a rawn chang chho ve leh a, mahse, singles dangah Japanese hmeichhe team zinga a thiamber dawttua ngaih No. 9 Mima Ito chuan Sutirtha Mukherjee laka 11-9, 11-4, 15-13 hnehna changin Japan hma a rawn hruaipui leh tlat.
Match lina pawimawh takah Batra chuan a game hmasa a pha ta lo a, Miwa lakah 11-6, 6-11, 11-2, 11-3-a tlawmin India chuan final thleng zo loin bronze an awrh zui ta a ni.
Nilaini vek khan Indian men’s table tennis team chuan quarter-final ve thungah 3-1-in a thlengtu Kazakhstan an hneh a, final an lut zo ta lo a nih pawhin kum zawna a vawithumna atan bronze medal a hmin phawt a, Asian Championship-a India medal lak pasarihna a ni nghal.
India mipa team hian nimin khan semi-final lamah Chinese Taipei leh Japan inkhela chak zawk zawk an tum zui leh nghal a, result erawh tarlan hman a ni lo.