Aspirational Block-a tih thatvangin thawktute chawimawi

Aspirational Block-a tih that
vangin thawktute chawimawi
NITI Aayog hnuaia Aspirational District 112 leh Aspirational Block 500 huamchhunga hmasawnna tluantling a awm theihnana beihpui thlak, ‘Sampoornata Abhiyan’ kalpui mekah Lungsen Aspirational Block hmasawnna tura thawktute chawimawina ‘Samman Samaroh’ leh kar khat awh tur tualchhung thilsiam pho chhuah ‘Aakanksha Haat’ hawnna chu Zirtawpni khan Lungleiah buatsaih a ni.
Aspirational Block Programme (ABP) hnuaia hmasawnna tehfung (indicator) 6 zingah Lungsen Block hian tehfung 4-ah 100% tihlawhtlingin, bronze medal a dawng a. Hemi kawnga thawktu hrang hrang hnenah chawimawina hlan a ni. August 1-8 chhunga Lungsen Aspirational Block huam chhunga self help group (SHG) leh tualchhuak thil siamtute thil siam phochhuahna, ‘Aakanksha Haat’ chu he hun hmanpuitu bawrhsap Navneet Mann chuan a hawng.
ABP indicator 6 zingah – hriselna leh chaw tha (health & nutrition) hnuaiah zunthlum (diabetes) endik, thisensang (hypertension) endik leh raipuar tana chaw tha (supplementary nutrition) pek that kawngah leh agriculture hnuaia lei hriselna endik leh soil health card pek chhuah kawngah Lungsen Block hian target 100% a hlen chhuak a. Indicator dang pahnih – raipuar an nau pai tirh thla thum chhunga inziahluh kawngah leh SHG-te tana bultanna sum lu (revolving fund) pek chhuah kawngah pawh hmasawnna nasa tak hmuh a ni.
Lungsen block development officer Lalhruailiana Zote hnenah bronze medal leh certificate hlan a ni a. District level-a department hotute – senior chief medical officer, district programme officer (Women & Child Development) leh district agriculture officer; block level official – PHC Lungsen medical officer, Lungsen ICDS child development project officer, Lungsen Block MzSRLM-a block mission manager leh cluster coordinator pahnih, a hmatawnga thawktu anganwadi worker 44, anganwadi helper 44 leh health official/worker 15 hnenah chawimawina hlan a ni.