Assam sorkar chuan polygamy tihtawp a nih theih nana dan hmanga hmalakna awm theite enfiah turin expert committee member pali awmna a din thu Chief Minister Himanta Biswa Sarma chuan a sawi.
Panel hi Justice (Retired) Rumi Phookan-an kaihruai dawnin thla hnih chhunga report thehlut tura tih an ni a. Member dangte chu Assam advocate general Debajit Saikia, additional advocate general Nalin Kohli leh senior advocate Nekibur Zaman te an ni.
“Polygamy tihtawp a nih theih nana dan hmanga hmalakna kalpui tum thu kan sawi hnuah expert committee din niin he committee hian ni 60 chhungin report an thehlut hman ang,” tiin Chief Minister chuan a sawi a.
Sarma chuan Thawhlehni khan State sorkar chuan State chhunga polygamy legislative assembly kaltlanga khap a nih theih nan expert committee din a ni ang a lo ti tawh a ni.
Hei mai bakah hian Muslim Personal Law (Shariat) Application Act, 1937 bakah Uniform Civil Code atana Article 25 of the Constitution, Directive Principles of State Policy nena inkaihhnawih te enfiah a nih tur thu a sawi bawk a.
Article 25 hian India mi tawh phawt chu a duh ang a tih leh sakhua eng pawh a tlangaupui a phalsak a ni.
“Uniform Civil Code (UCC) kan kalpui dawn tihna a ni lova ram pum huapa kalpui tura remtih ngai a ni a, he mi atan hian Central sorkar chuan hma a la mek a ni,” tiin Sarma chuan a sawi bawk a.
Sarma chuan ‘UCC chu a huam a zau a’ tia sawiin, Assam-ah chuan, “UCC kaihhnawiha tel tho polygamy khap kan tum a ni,” tiin a sawi.
Assam-ah polygamy tihtawp ngei tum
Get real time updates directly on you device, subscribe now.
Prev Post