Assam Assembly-ah Opposition te chhuak tau

Opposition Congress leh AIUDF te chu February 26 khan State cabinet in Assam Muslim Marriages and Divorces Registration Act, 1935 a nuaibo avangin Assam Assembly atangin an chhuak tau.
AIUDF te chuan Cabinet thutlukna chu sawiho a nih theihnan adjournment motion an pulut a, mahse Speaker Biswajit Daimary chuan a hnawlsak a ni.
Congress te chuan original Bill chu a vaia hnawl vek lovin siamthat theih mai zawk a ni an ti ve bawk a.
Assam Cabinet chuan February 23 khan he Act hnawl hi remtiin a chhan bera an tanchhan chu State a child marriage tihtawp a nih theih nan a ni tiin Chief Minister Himanta Biswa Sarma chuan a sawi.
Opposition party te sawiselna chhangin Sarma chuan Bill chu hnawl a ni dawn a, chu chu child marriage nuaibona kalkawng a ni a ti a. “Ka dam chhung chuan Assam ah child marriage a thlen ka remti dawn lo” tiin a sawi.
Congress te chu House atangin Cabinet thutlukna duh lovin minute 10 chhung an chhuak tau a. AIUDF legislators te chu au chungin House Well an pan a, chhuatah minute nga vel an thu bawk.
A hnuah Speaker in business list a kalpui zui avangin lungawi lovin an chhuak tau a ni. Opposition CPI (M) legislator leh Independent MLA te erawhin engmah sawi an nei ve lo thung.