Assam hmun him lo laia chengte silai license pe dawn
Assam sorkar chuan ‘hmun ralri leh kilkhawr deuhva cheng’ ram leilung fate leh Bangladesh ramri hrula chengte chuan an invenna atan silai licence an siamsak dawn tih Nilaini khan Chief Minister Himanta Biswa Sarma-a’n a sawi.
Thuthar lakhawmtute a kawmnaah Sarma chuan heng lai hmuna chengte ‘mamawhna’ hriain tun hnaia cabinet thutkhawmah thutlukna an siam tih a sawi.
“Assam hi hmun danglam leh boruak neuh neuh tamna state a ni a. Assamese thenkhat chu an awmna hmunah him tawk lovin an inhria a, silai kawl phalna neih hi a hma daih atang tawhin an lo phut tawh thin a ni,” a ti.
Ram leilung fa tam tak chuan ‘Bangladeshi atanga vauna leh an khaw chhung ngeiah pawh tihthaihna’ an dawng nasa tih Sarma chuan a sawi a. “An dinhmun kan thlirin hlauvin an khawsa a, hemi atanga an hima an lo inven nan leh dan lova Bangladeshi lo lutte hnawh chhuah an awlsam zawk theih nan ruahmanna hi siam a ni,” a ti.
Chief minister chuan state sorkar chuan licence an neih theih nan thil a buaipuisak dawn tiha sawi a. A nei thei turte chu ram leilung fa dik tak leh a cheng ngei, hmun kilkhawr leh ralti deuh laia chengte chauh an nih tur thu a sawi bawk.
Sarma chuan Dhubri, Morigaon, Barpeta, Nagaon leh South Salmara-Mankachar district-ah te heng hmunte hi a awm niin a sawi a. “Heng hmunah hian kan mite hi a tlem zawk leh chak lo zawk an ni,” a ti.
Sorkar chuan ralthuam a leisak dawn lo va, an neih theihna turin a pui dawn lo va, licence chauh a pe dawn tih a sawi bawk.
Assam hmun him lo laia chengte silai license pe dawn
Get real time updates directly on you device, subscribe now.