K.Zoremtluanga
Mission Vengthlang
-- Advertisement --
Ka hriat theih chinah MNF Sorkar hmasak 2008 hma atang daih tawh khan Aizawl laili lai taka awm Assam Rifles ho hmun hi chhuahtir tumin hma an lo la tawh thin a. Hei Sorkar thar apiangin rawn chhunzawmin rawn chhuahtir hi an tum ve ta zel a. Eng atan taka hman an tum sawi awmchhun ka hriat chu Auditorium lian deuhsak nan tih bak engmah tak tak sawi hi a awm ngai meuh lo.
Election Campaign thlengin an sawi tel ziah thin a. Engpawh Sawrkar se an Manifesto-ah hian a tel ve deuh ziah a, campaign laiin a bik takin. Mahse tu Sawrkar mah chuan an awmna tur hmun an sakna Zokhawsang lama sawn phei thei erawh chu an la awm hrih lo chu a ni a.
Mahse 26 Oct khan Assam Rifles Lt Gen leh Pu Vanlaldina Commissioner GAD, chuan Delhi Mizoram House-ah MoA, CM Pu Lalduhoma awm lai khan an sign ngei mai a. Kha thil kha insawn chhhuahna tak tak tur a nih chuan, an insawn chhuak ve tak tak tawh mai ang a, nge tun term chhung chuan tih ten ka lo ngaihtuah a. Emaw rang tawk hian an insawn chhuak zawk anga tih mai mai ten ka lo ngaihtuah a. A chhan chu ka hriat sual loh chuan Agreement Assam Rifles Chief of staff ten an signpui ve mai a ni tlat tawh lo a, MNF leh Congress pawh khan an lo signpui ve tho vang te pawh a ni pakhat a.
Hei hi kei chuan an chhuah hi ka lo hlauh zawk tlat thung a, article danga ka insawi tawh angin, “Kei chu Nationalist ka ni lo, Patriot ka ni” ka inti deuh kher thin a. A inzawm lo pawh lo ti ula, in mawh love. Enviromentalist emaw chu ni ve lo mah ila, kan Aizawl boruak tihchhe thei zawnga mi thiltihthei te an chet vak ka hlauh em vang ber hi a ni a. Amaerawhchu ka pian ka seilenna, thlahtute atanga chhut phei chuan hriat theih chinah chhuan 3na, Aizawl mi dik tak ka nih avang pawh a ni mahna, Kan Ram neihchhun khawpui ber Aizawl hi boruak chhe zel leh Aizawl kan hmuh ve phak te, phak loh thlalak hlui kan hmuh phak loh kum 30, 40+ liam ta te en mai pawh hian PLAN awm lo lutuk lo tih a chiang a, Mawi deuhva siam theih reng hetiang mai maiin kan chhuah a. Chu chu tun thlenga architech, engineer rual kan ngah tawh hnu pawh hian kan la chhunzawm deuh tlat tho mai a. He mi system bawk hi an rawn plan chung pawh hian, “from the top” avang nge, a building chiah hi a nalh a ni deuh mai hian ka hriain ka hmu a. A surroundings nalh ve deuh deuh chu awm ve zeuh zeuh tho mah se landscaping nalh leh boruak ti thianghlim tura kan architech-te leh engineerten an la ngai pawimawih tawk lo leh hmuh tur pakhatmah awm leh lo si lo chu kan la hnufumzia a ti lang chiangtu niin ka hria. Sum tam tak seng ngai lova PARK han siam telte leh artificial lake lian lo te te sangha khawi na tur mai mai kan MINECO ramahte sawn a tam tehlul nen ti sawn, Office parking tha tak nei pawh saw tlemte chauh an la awmte saw a ngaihtuah thui loh thlak e te kei lungmawl ve mai hian tiin ka lo ngaihtuah a.
Kan peng ta deuh daih, kan topic ber ka hlauh chhan tak chu sawi tawh angin, kan khawpui ber vawng daitu ber hi ASSAM Rifles ho ram chauh saw a ni tih i ngaihtuah ngai em? Treasury square leh Zodin square vawng daitu pawh saw engdang ni lovin Bung kung awm ve ve vang mai mai saw a ni a. Mission Veng leh a chhehvel vawng daitu ber pawh banglapui bul leh a chhevel saw an nia.Chutiangin Chaltlang te Chammari te vawng daitu pawh Chaltlang kham te, Laipuitlang kham te an ni hlawm a. Chu pawh tihtham an ni tawh chuang lo.
Chutah Assam Rifles saw chhuak ta se, sawlai hmun saw eng atan ber nge kan hman ang fih hi kan Sorkar apiang hian an sawi tel ngai lo reng reng a. Hmanni chanchinbua ka hmuh, “Assam Rifles te chu border a awm tur alawm, ngatinge khawpui chhungah an awm” te ti mai mai. Border ah chuan Border Security Force BSF an awm. |henkhatin kawngte a zauh phah anga, thenkhat chuan Lammualte pawh kan ta a ni tawh anga tih vel te, a thlir thiam deuhin Park atan te kan hmang anga te pawh kan lo ti pawh a ni thei e. Mahse a nihna takah chuan tha tho mah se a ho ka ti.
Eng atan nge eng Sorkar mah hian an hmanna tur hi an sawi ngai lo, mahse LSC mi 40 to 50 chuan CYMA in an chhui khan an lo nei daih tawh. Han chhuak chiah se chu e, kan Aizawl boruak vawng daitu, tinuamtu, zothlifim kan tihte hi Aizawlah hian a awm mang tawh lo mai thei a ni. A khawpui chhung bikah phei chuan, vairam khawlum ang deuhvin boruak lum hi a la thaw a la thaw ve mai ang.
A chhan chu mi 40 to 50 LSC an chhui chhuah theih chuan, kha’ng lo pawh kha engzatnge lo la inphum ru awm ang? A awm zawng zawng pawh lo ni ta reng se, Sawlai Assam Rifles hmuna LSC nei pha chin chu mi rethei an awm dawn lo hrim hrim tih chu thil chiang sa a ni a.
Han chhuak vaih se chuan, hma an han la tak tak ang a, Kawngte feet 30 paw’n lo zauh phah mah se, a bak chu Mall lian deuh deuh leh building lianpui pui a ding khat leh fur ang a. Kawngte pawh short cut eng eng emaw chu a awm phah ngei ang, mahse Aizawl boruak chu a hreawm tawh viau ang; 30°C chung lam hi kan average nghal thuai ang tih a chiang sa.
Chuvangin kei chuan Zokhawsang lamah sawn min chhuahsan ang tih ka hlau ngawih ngawih asin. Ngaihtuah chiang mah teh u, a tuartu ber chu a mipui bawk kan ni leh dawn. Anni chuan AC Room an nei vek ang a, AC car nen, keini tan chuan kha kha thil theih mai mai a ni ve dawn lo tih hria ila. Chung te a nih avang chuan mi chhuahsan dawn a nih pawn kan ASEP te, Enviromentalist hote kha rawn inrawlh vat r’u. Chuti lo chu ram mawi deuh, hotea plan a nalh deuh deuha chhuak thei mai tur hi kan ti khawlovin mawi lo takin kan chhuah leh thei tih hria ila, chumi lo thleng hmasa tawh atangte hian inzir ila, a thlen tawh loh ngei nan theihtawp i chhuah theuh ang u.
Kan khawpui neih chhun Aizawl hi ruah pawh sur mah se, khaw ro taka a chan loh hram nan sawlai hmun saw kan hmun tha leh Aizawl veng ngaw hmun awm ve pakhat ang a ni a. New York khawpuiin an khua timawitu ni mai lova, an Central Park siam chhan ber chu an khaw vawngdaitu atana an siam a ni a. Chutiang chiah chuan kan khawpui Aizawl pawh hi park te leh thingkungte an tirem a nih dawn chuan, chhuak lo zawk mai se, a tha mai zawk lo maw???? An chhuak dawn a nih pawhin condition neiin kan, Environmentalist te, NGO thenkhat te hian thahnem ngai takin inrawlh ve tak ve se a tha lovang maw?