Assam tui lian pahnih thih belh, mi 19 thi tawh
Assam-ah tui lian avanga mi pahnih an thih belh leh hnuah mi 19 thi an awm tling ta a, hmarchhak state-ah hian ruah a la sur deuh reng avangin mi nuai 6.7 chuang tui lian hian a la tibuai mek tih thuneituten an sawi.
Ni hnih liam ta chhungin Assam leh hmarchhak hmun dangah ruah sur hi nasa tak a ni tawh lo va; mahse, India Meteorological Department (IMD) chuan Assam leh Meghalaya bikah Ningani atanga Zirtawpni zing thleng la sur leh hle turin a sawi lawk.
Assam State Disaster Management Authority (ASDMA) thuneitute chuan Zirtawpni atang khan tui lian avangin mi 14 an thi tawh a, lei min avangin mi panga an thi tawh bawk tih an sawi.
“Cachar leh Nagaon-ah darkar 24 liam ta chhungin mi pakhat ve ve thi an awm leh a. Zirtawpni atanga Thawhlehni thlengin tui liana thi hi mi 12 an awm a, Thawhlehni bikah khan mi paruk lai an thi a ni,” an ti.
Assam-a lui lian – Brahmaputra, Barak, Kopili, Sonai, Dhaleshwari, Katakhal leh Kushiyara te chu hlauhawm chin chhinchhiahna chungah vek a la luang a, tui lian chim chin pawh a la zim thei lo.
Lo hectare 15,0000-a zau vel tuiin a la chim a, lo neitute chuan an thar chhuah pawh a tlem phah an hlau hle.
District 21-a relief camp siamah mi 41,317 an la khawsa a, district thuneituten ei tur leh ni tin mamawh dang an pe.
Chief Minister Himanta Biswa Sarma chuan Nilaini khan tui lenna hmun thenkhat a tlawh a. Prime Minister Narendra Modi leh Home Minister Amit Shah te pawhin Sarma hi an be tawh.
Assam Congress president, MP ni bawk, Gaurav Gogoi-a pawhin Nilaini khan Cachar district-a tui lian tuarte a tlawh bawk.
Manipur-ah pawh tui lian avangin mi 1,65,787 la buaiin lo hectare 115.59-a zau tuiin a la chim bawk.
Relief & Disaster Management Department chuan Nilaini zan thleng khan thi pakhat a awm tawh tih an sawi a. Mi 4,097 vel hmun himah thiar chhuah niin in 35,342 vel a chhia a, hmun tam tak tlawhpawh theih rih loh a la awm avangin in chhia hi a la pun an ring.
Relief camp 87 siam a ni a, ran vulh 74 thi a awm tawh.
Assam tui lian pahnih thih belh, mi 19 thi tawh
Get real time updates directly on you device, subscribe now.