Assam tui lianin ziaawm lam pan, mi 30 thi tawh

Assam tui lianin ziaawm lam pan, mi 30 thi tawh
Assam-a tui lian chuan ziaawm lam pan hret hret zelin mihring leh district a tihbuai zat a tlahniam zel a, hetih lai hian kuminah tui lian vang hian hmarchhak state liana thi chu mi 30 an tling tawh.
Assam State Disaster Management Authority-in bulletin a tihchhuahah Nilaini khan Morongi revenue circle, Golaghat district-ah tui lian vanga thi pakhat awm lehin ani nen hian mi 30 an tling a, heng zinga mi paruk hi lei tawlh vanga thi a ni.
Chief Minister Himanta Biswa Sarma chuan an state chuan chung lama ruah sur nasa avangin tui hi a lian niin a sawi a. “Kan sorkar chuan a tuartute mamawh ngaihtuahsakin chhanchhuah leh chhawmdawl hna a thawh char char a ni,” tiin X-ah a tar lang.
District panga – Golaghat, Nagaon, Hojai, Karbi Anglong leh Jorhat-a revenue circle 14 leh khaw 175-in tui lian hi an la tuar a. Mi 29,000 chuang la tibuaiin Golaghat chu a tuar na ber niin mi 23,084 a tibuai a ni.
Golaghat district-ah hian agency hrang hrang, thuneitu leh tual chhung miten chhanchhuah hna hi an thawk a ni.
Thawhlehni khan tui lian hi district paruka mi 32,000 chuangin an la tuar a, a tlahniam zel.
Mi 5,000 chuang an in leh lo chhuahsan phah awmin relief camp 38-ah khawsaktir an ni a, relief distribution centre 24 siamah chhawmdawlna sem chhuah a ni bawk.
Thlai chinna hmun hectare 3,386 tui hian chimin ran 87 a la bo.
Dhansiri lui chu hlauhawm chin chhinchhiahna chung lamah hmun hnih – Golaghat leh Numaligarh-ah a la luang a. Kawngpui leh electricity ban eng emaw zat district tam takah tihchhiat leh tihtluk a nei niin ASDMA bulletin chuan a tar lang.
Agriculture Minister Atul Bora chuan tui lian tuar nasa zualte hi tlawhin an dinhmunte a thlithlai a. “Tui lian dinhmun thar lam enin Bokakhat constituency bakah Kuruwabahi leh Chinakana chu vawiin khan ka tlawh a. Mi chengte nen inkawmin chhiatna thlen dan leh chhawmdawlna kalpui dante ka en a ni,” tiin Nilaini khan X-ah a tar lang.
Thuneitute chu tui lian tuarten harsatna dang an tawh loh nana thawk tur leh puihna leh zangnadawmna pawh an dawn ngei theih nana tan la turin a chah bawk.