Assamese zaithiam Zubeen Garg an post-mortem nawn hnuah an vui ta

Assamese zaithiam Zubeen Garg an post-mortem nawn hnuah an vui ta
Assamese zaithiam hmingthang Zubeen Garg chu September ni 19 khan Singapore-ah tui-a chesualin a boral a, Singapore-ah hian post-mortem a ni tawh nain, a ruangin Assam a thlen hnuah mipuiin post-mortem nawn leh an phut nasat em avangin nimin khan Guwahati Medical College & Hospital-ah AIIMS doctor-te nen an post-mortem nawn leh ta a ni.
Zubeen Garg hi Kamarkuchi khua, Sonapur-ah state chawimawina famkim nen a ruang halral a ni a, Assam CM Himanta Biswa Sarma pawhin Zubeen halralna tur hmun hma te leh inbuatsaihna te a endik hmasak thu X-ah a lo post ve tawh bawk.
Prime Minister Narendra Modi pawhin X-ah zaithiam lar Zubeen Garg thihna chuan a thawn thu leh rimawi khawvela a hniak hnutchhiah hlu tak te chu hriat reng a nih tur thu a puang a, Rahul Gandhi pawhin Zubeen Garg thihna chu channa nasa tak a nih thu leh talent nei tha chungchuang, Assamese rimawi khawvel siam danglamtu a nihna te a sawi ve bawk.
Zubeen Garg thihna hian Assamese -te a thawng na hle a, a hun hnuhnungah pawh mipui sing tam tak a ruah thlahin an pungkhawm a ni.
Zubeen Garg hi November ni 18, 1972 khan Tura, Meghalaya-ah a piang a, naupang têin rimawi khawvelah a zuang lut a, music instrument chi hrang hrang tum thiam tak niin, 1992-ah a album hmasa ber ‘Anamika’ a tlangzarh atangin Assamese rimawi khawvelah a invawrh sang nghal hle a ni.
A rimawi zinkawngah hian tawng chi rang 40 chuangin hla 35,000 chuang a record hman niin an tarlang a, Assamese, Hindi leh Bengali te chu a hla record tam ber a ni. Assam-ah chuan superstar ni reng tawh mah se 2006-a ‘Gangster’ soundtrack ‘Ya Ali’ chu ram pum huapa rawn vawrh lartu a ni ta a ni.