Assembly Budget Session tan Larsap-in House-ah thu a sawi

Mizoram Legislative Assembly 9-na thutkhawm vawi 6-na chu Thawhlehni khan tan a ni a. Larsap Gen. Vijay Kumar Singh (Retd) chuan House-ah a sawrkar hmalakna langsar zual a sawi.Larsap chuan sawrkar hotu tha tak takte azarah Mizoram chu remna leh ralmuanna hmun ala ni zel a, sum leh pai dehchhuah leh hmasawnna lamah kawng dik a zawh zel a, Mizoram chu a tha lama state entawn tlak ni turin hma lam a pan mek tih a sawi a ni.
Sawrkar rintlak, mawhphurhna hlen, langtlang ni turin theihtawp chhuah zel a ni, tiin, ei leh bar intodelh, hmasawnna ruhrel din belh zel leh, hlawk zawka thil siam leh dehchhuah lamah pawh hma la zelin, a bikin state hausakna – mau hman tangkai leh tualchhung hmanrua dang, thalaite kutthemthiam leh mahni kea ding thei turin an thiamna leh theihna tihpun chu ngaihpawimawh ber zingah a tel tih a sawi.
Centrally sponsored scheme-ah rang leh fel zawka sum inpek zung zung a, hman loha sum awm mai mai tih tlem a nih theihnan Ministry of Finance-in SNA SPARSH hman tura a chhawpchhuah hnu ah, 2026 January 23 thleng khan Mizoram sawrkar chuan sanction a hmuh cheng vaibelchhe 867.34 atangin vbch. 403.26 (46.49%) chu pekchhuah a ni tawh tih larsap hian a sawi a. Mizoram chu a hun taka sum hman leh chetvel kawngah state titha pawl zingah a tel pha tih a sawi a ni.
e-Office system hman uar zel a ni a. Civil Secretariat leh Planning & Programme Implementation department-ah hman tawh niin, directorate leh subordinate office zingah a hmang duh in report tura tih an nih angin, office 26 chuan an hman duh thu an thlen tawh a, e-office hmang turin ruahman mek an ni tih a sawi.
Hemi hman tangkaina pakhatah Centralised Public Grievance Redress and Monitoring System (CPGRAMS) kaltlangin 2025- 2026 chhung hian lungawilohna/ sawiselna thehluh 967 dawn a ni tawh a, heng zinga 873 chu chinfel tawh niin, 94 la chinfel loh a awm a. Hemi ang bawk hian state sawrkarin a siam ‘Mipui Aw’ kaltlangin thu thehluh 197 dawn a ni tawh a, 161 chinfel niin, 36 chinfel loh ala awm tih a sawi a ni.
Bana Kaih Scheme hnuaiah Chief Minister’s Special Package chu a dawngtu tur mi tam zawk hnawhluh an nih theihnan Rs.50,000 a tihhniam a ni tih larsap hian a sawi bawk.
Larsap hian sawrkar department hrang hrangin hma a lakna leh hmasawnna a neih a sawi a. Mizoram Legislative Assembly rorelna kalphung zahawm tak vawnhim kawnga sulhnu duhawm tak a neih chu chhawmnung zel turin member-te a sawm a ni.
Larsap thusawi zawh hian ama hoin House member-ten thla an la ho a. Raj Bhavan-a a kirsan hnu ah Session hi chhunzawmin, larsap thusawia lawmthu sawina motion chu House member Lalramliana’n a pulut a, larsap thusawi hi vawiin – Nilaini hian House-ah sawiho a ni ang.