Assembly Jubilee lawmna khar

Mizoram Legislative Assembly-in kum 50 an tlin (Golden Jubilee) lawmna chu Nilaini khan khar a ni a. Speaker Lalrinliana Sailo bakah deputy chief minister Tawnluia, minister-te, MLA-te leh Former Legislators’ Association of Mizoram member-te an tel.
Kum khat awh MLA Golden Jubilee kharna inkhawmah hian deputy chief minister chuan ram hruaitu hmasaten bul an lo \an tawhna chu fakin, an kawng tuaihnum sa vawng nung zel tur leh an thawhrimna hre reng turin legislator-te chu a chah. Mizoram Legislative Assembly chu zahawm leh entawntlak taka rorelna hmun leh sawi hona hmun a ni thin tih sawiin, state dangte nen khaikhinin a felfaiin boruak a tha thin hle a, anmahni thlangtlingtute zahawmna an hum chu lawmawm a tih thu leh chhawmnun zel a \ul tih a sawi.
Deputy speaker H Biakzauva, minister Dr R Lalthangliana, FLAM president Liansuama te pawhin thu an sawi a. Tunah hian ex-MLA 59 an awm a, member boral tawh nupuite chu associate member-a lakluh thin niin, an ni nen hian FLAm member 154 an awm.
Speaker Lalrinliana Sailo chuan Golden Jubilee kharna hun tluang taka an thleng thei chu lawmawm a tih thu a sawi a. MLA ni tawh leh ni mekte thawhhona a tha hle a ni, tiin, Assembly Secretariat-a thawktute inpeknaah lawmthu a sawi bawk. Mizoram politics chu Mizo Mizona leh Kristianna in a kaihhruai thin thu sawiin, tawngkam pawh an uluk tlang hle thin tih a sawi. Hruaitu hmasate leh dan siam tura thlan tlin MLA-te chhe lailet der leh thil tha tih reng reng neilo anga sawi thin chu pawi a tih thu te, kum 1972 atanga vawiin thlengin MLA ni tawh 232 an nih thu te sawiin, “Ram tana thawk tha leh sulhnu ropui tak tak nei vek an ni,” a ti. Zirlaite tana hlawkna a nih beiseiin kumin atang chuan Assembly House chu zirlaite tlawh theiha hawn a nih tawh dawn tih speaker hian a sawi bawk.
Mizoram Legislative Assembly term khatna leh hmasa ber chu 1972 May 10 khan neih \an a ni a, kum 50 a tlin lawmna pui ber chu 2022 May 9-10 khan neih niin, kum khat chhungin lawm dan leh intihhlimna chi hrang hrang neih a ni.