Assistant referee hrem zui lo
Pathianni zan Premier League inkhel ngaihven hlawha Liverpool leh Arsenal inhmachhawn tum khan assistant referee Constantine Hatzidakis chuan Liverpool player Andy Robertson kha a khabeah a kiu hmangin a nghawk fuh niin a lang a, Football Association lamin thil thlen dan an enchian hnuah assistant referee chunga hremna an lek zui loh tur thu an puang.
Anfield inkhel first half tawp dawnah Robertson khan assistant referee a va pan laiin Hatzidakis khan a khabeah kut a lo nghat ngei niin thlalak lamah hmuh tur a awm a, Liverpool player-in yellow card a hmuh hnuah assistant referee erawh thiam changin a chhuak thung.
Match official chuan a hun tawn sawiin, “Match ka vil leh thei dawn a; Anfield thil thleng chhuina kawngah theihtawpa thain FA ka thawhpui a, Andy Robertson nen pawh tlang leh inpawh takin thil thlen dan kan sawi dun a; ka ban a manbeh atanga talchhuah ka tumna lamah ka tawkfuh palh mai chauh a ni a, ka tum luih leh tih luih vang reng ni lo mah se thupha ka chawi nghal a ni,” a ti.
FA lam pawhin thuchhuah an siamah thil thlen dan an ennawn hnuah hremna han lek chiamna chhan tur a awm loh thu an sawi ve bawk.
Premier League referee hlui Keith Hackett khan BBC Radio 5 Live hnenah thiam loh chantir ngat se Hatzidakis-a career-in nasa takin a tuar dawn tih a sawi.
Anfield-a khatiang boruak a thlen hma lawk khan Fulham striker Alexsandar Mitrovic chuan Manchester United game-ah referee a nam a, game riat chhung inkhel thei loa hrem a ni.
Tun April thla tir te khan Mexican referee Fernando Hernandez chu Mexican top flight-a America leh Leon intum tuma a khawsak dan avangin match 12 chhung inkhel vil thei lo tura hrem a ni ve thung.
April ni 2, Pathianni khan Hernandez hian thil thleng tamna inkhelah yellow card paruk ngawt phawrhin, team pahnih manager ve ve technical area atangin a hnawtchhuak bawk a, hei mai bakah hian Leon player Lucas Romero chu a thingthit hnan rap bawk a, hremnain a zui ta a ni.
Team pahnih 2-2-a inhnehtawkna inkhela referee khawsak dan avang khan Romero-a team-mate rual an thinrim hle a, video assistant referee review pawh na takin an phut a, a hnua thil thlen dan chhuichian a nih hnuah match 12 tan hremna pek a ni a, Romero pawh match hnih inkhel thei lo tura tih a ni ve bawk.
Kha match khelh zawh hnu khan Mexican league table-ah Leon hi pathumna niin, America chu palinaah an thu thung.
Assistant referee hrem zui lo
Get real time updates directly on you device, subscribe now.
Prev Post
Next Post