Aston Villa leh Brighton in hma lam an pan

On May 12, 2025 4 0

Inrinni zan khan English Premier League (EPL) khelh chhunzawm a ni a, Aston Villa leh Brighton ten hnehna changin hma lam an pan a, European competition khelh phak tuma inelna boruak a nung thar leh zual.
Bournemouth 0-1 Aston Villa
Champions League khelh phak nawn leh tuma tan khawh Aston Villa chu AFC Bournemouth hmachhawn turin Vitality Stadium-ah an leng lut. AFC Bournemouth hi 10-naa awm mek an ni a, an chunga awmte nen an inkar a zauh lem loh vangin European competition khelh phak beiseina an la nei ve mek zel bawk. European competition hmachhawn phak tura chak mamawh ve ve an nih vangin inkhel pawimawh tak a ni a Mualneitu Bournmouth leh mikhual team Aston Villa te hian chak tumin tan an khawh nasa dun hle. Inkhel hmuhnawm takah vannei zawk Villa an ding chang a, point thum hlu tak an hmu.
Season kal mekah champions league khel phak a, League round-ah beisei phak baka chethain Aston Villa hian quarter-final an lut hial a. Quarter-final ah season kal meka English club te ngam loh Paris St-Germain ngam lovin an tla a, semi-final an lut zo lo. UCL-ah a tawp an thlen zawh loh vangin season tharah champions league khel phak tur chuan EPL table-ah panga tal an luah phak a ngai dawn. Top 5 huangah awm phak ngei tumin tan an khawh a, AFC Bournemouth an hneh vangin beiseina sang zawk an neih belh.
Vitaly Stadium a lenglut Aston Villa hian an khel tha lua bik lo a, goal pawh an thun thei lawk bik lo. Chawlhlawk hmain goal a lut thei dawn lo emaw tih hnuah Villa tan hian Ollie Watkins chuan minute 45’+6-naah hmahruaina goal a thun a. Watkins goal thun hmang hian si khat faia hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, goal thun tumin an innawr tawn nasa hle. An mualah goal thun an tum luat vangin hun tawp dawn hnaih lamah Bournemouth an chesual a, an player pawimawh tak Jacob Ramsey chu minute 86-naah hnawhchhuah a ni. Goal thun an mamawh em em laia kim lo zawk an ni hian Bournemouth tuan a tifum a, an thahrui a chhat a ni hawt mai. Tlem zawk an nih bawk vangin goal an thun thei ta lo tluang a. Point hmuh an mamawhna inkhelah uiawm takin an tlawm a, 10-naah an awm zui a ngaih phah ta a ni.
Mikhual an nihna muala point thum hlu tak an hmuh vangin Aston Villa hian hma lam an pan a, champions league khelh phak an hnaih deuh deuh zel. Villa hian khelh 36 atangin point 63 an hmu a, paruknaah an awm mek. An chung chiaha awm Chelsea nen an point hmuh a inzat mek a, palinaa awm mek Manchester City aiin point hnih chiahin an hniam zawk a. Vawi khat chakin pathumnaa awm mek Newcastle United umpha thei dinhmunah an ding mek bawk. Heti a nih vang hian champions league khelh phak tuma inelna boruak a ngaihnawm chhunzawm zel a. Game hnih chauh khelh hmabak awm tawhah inelna boruak a lian zui hle ngei dawn a ni. Villa hi paruknaa awm mek mah se an hnuai chiaha awm Nottingham Forrest an chak chuan pasarihnaa an tlahniam leh duai dawn thung.
Brighton leh Welback an kal zel
Inrinni zana inkhel dangah team lian Manchester City chu tlahniam chiang tawh Southampton nen goal awm lovin an inhnehtawk rignawt. City hian mikhual an nihna mualah an player tha ber ber chhawr bawk mah se hnehna an chang zo chuang lo a, point thum hmu se pathumna ni thei an ni naa palinaa an awm zui a ngaih phah. City an chak zawh loh lai hian Brighton & Hove Albion chuan Mimualah hnehna an chang ve thung a, European Competion khelh phak beiseina sang zawk an neih theih phah.
Brighton hi Wolves hmachhawn turin Molineux Stadium-ah an lenglut. Mikhual an nihna hmualah an khel tha viau a, si hnih faiin hnehna an chang.
Brighton tan hian season kal meka khel tha tak Danny Welbeck chuan minute 29-naah penalty atangin hmahruaina goal a thun. EPL a player hriat hlawh ve tak Welback hian EPL season kal mekah goal 10 a thun tling chiah a. Hei hi English Premier League season khatah goal 10 a thun tlin vawi khatna a ni a. Season 16 chhung ngawt season khata goal 10 a thun tlin theih loh hnuin season khata goal 10 thun tlin chu a nghak chhuak ve ta nge nge. Welback hian EPL-ah vawi 362 a khel tawh a, goal 77 thunin assist vawi 31 a nei tawh bawk.
Minute 29-naa Welback-a’n hmahruaina goal aa thun hnu hian Brighton an khel tha zui viau a, hun rei tak chhung goal a luh belh theih loh hnu, hun tawp dawn hnaih minute 85-naah Brajan Gruda chuan an goal hnihna a thun zui leh a, an hmahruaina a tizau. Goal dang lut lovin inkhel a tawp a, Brighton in point thum hlu tak an hmu a. Khelh 36 atanga point 55 hmuin Europa Conference League tal khelh phak ngei an tum.