Atalanta in Dortmund an lehthal

Nilai zan khan UEFA Champions League (UCL) last 16 play-off second leg khelh chhunzawm a ni a, 2-0 a hnufual tawh Atalanta chuan Borussia Dortmund an lehthal a, last 16 an lut. Atalanta in Borussia Dortmund an hnawhchhuah tum hian inkhel hmuhnawma thleng tur zawng zawng; Goal, Penalty leh Red card te a thleng kim vek. Atalanta hi Italian Serie A club zingah last 16 lut awmchhun an ni.
Italian club Atalanta hi Borussia Dortmund mual Signal Iduna Park-ah an lenglut hmasa a, mikhual an nihna hmunah 2-0 in an tlawm. First leg-a tlawm tawh an nih vangin an mualah chak ngei an mamawh a, chak tumin tan an khawh nasa viau bawk. An phu ang ngeiin an mualah an chak a, German club lehthalin round sang zawk an inhlangkai.
Chak mamawh Atalanta hian an mualah an khel tha a, goal pawh an thun hma hle. Inkhel tirtea an hun tha neih hlah bawk mah se minute ngana lekah Dortmund tlarhnung chetsual vangin Gianluca Scamacca chuan hnaite atangin a pet goal a, hmahruaina goal a thun.
Hma takah goal an thun vangin Atalanta an phur a, goal thun belh tumin an mikhualte an nawr zui nasa hle. Hlauhawm siam fo mah se si nghak chetha tak Gregor Kobel an paltlang nawn thei mai lo. Goal lut a awm belh theih loh reng hnuin Davide Zappacosta shot tha zet chu Dortmund defender in an lamah a dang pial lut a, Atalanta in an goal hnihna thunin, si belhkhawma an si phurh an sut zo ta chiah.
Chawlhlawk hnu lamah Atalanta an khel tha chhunzawm a, goal an thun belh leh thuai. Minute 57-na lekah Mario Pasalic chuan fuh takin a tauh goal a, si belhkhawma hma an hruai letna goal a thun. Hma an hruai let vangin Italian team an phur viau naa an phur rei thei bik lo thung. Vanduaithlak taka an hun tha hlah fo Dortmund an che fuh ta nge nge a, minute 75-naa Karim Adeyemi goal thun hmangin an si phurh an sut ta nge nge. Premier League club te pawhin an ngaihven em em Adeyemi goal thun hmangin Dortmund in an si phurh an sut a, si belhkhawmah 3-3 in an inhnehtawk ta chiah.
Dortmund in goal an thun hnuin inkhel boruak a tang zui viau a, inkhel hmuhnawm tak an pho lang. Goal thun tumin an innawr tawn fova, hun tha nei ve ve mah se an si nghakte an chetha dun viau a, goal an chhuah mai mai duh lo. Hun pangngai leh hun pek belh tawp dawn thlengin goal a luh belh thei lova, last 16 lut tur zawk tichiang turin minute 30 dang an khelh zui leh a rinawm hman hle.
Inkhel hmuhnawm takah goal a luh belh theih loh reng hnuin hun pek belh tawp dawn hnaihah Borussia Dortmund an vanduai a, penalty an chawi. Dortmund defender Ramy Bensebaini chuan tum lawk hauh lohin Nikola Krstovic lu-ah a pet palh a, penalty a chawi. Krstovic hian penalty a chawi bakah red card a hmu tel bawk a, chhe takin a tawp a khar. Krstovic-a’n penalty a chawi leh red coard a hmuh hian boruak a tilum thar hle a, bench a thu player pahnih; Giorgio Scalvini leh Nico Schlotterbeck te hnawhchhuah an ni a, a rualin player pathumin red card an hmu. Bensebaini penalty hlawhchhuah hi Lazar Samardzic chuan minute 90+8-ah tha zetin a pet goal a, an chakna goal a thun.
Lazar Samardzic goal thun sut turin Borussia Dortmund in hun an nei tawh lova, 2-0-a an heh tawh Atalanta lakah uiawm takin an tlawm a, last 16 an lut zo lo. Atalanta laka an hun tha neih vawi engemaw zat chu mak tak maiin an hloh a, hun tawp dawnah vanduaithlak takin penalty an chawi zui leh bawk. Heng zawng zawng hi an ngaihtuahkir leh thin ang a, Borussia Dortmund hian an ui vawng vawng thin ngei ang.
’Champions League atangin Italian club lian Napoli, Inter Milan leh Juventus te an tla vek a. Italian club zingah rau rau pawh nem deuh der tura ngaih Atalanta in last 16 an lut nawlh hi football tingaihnawm zualtu a ni.