ATC-ah Republic Day hmang

ATC-ah Republic Day hmang
Aizawl Theological College chuan Thawhtanni zing khan anmahni hmun Durtlang Leitanah Republic Day 2026 an hmang a. Home minister K Sapdanga’n a hmanpui.
Home minister hian ram puanzar a pawtpharh a. Ram puanzar an pawh pharh hian mahnia ro inrela dan mumal tak (Constitution) kan hman tanna ni min hriat chhuah tir se. India ram chu dikna, intluktlanna leh inpumkhatna ram ropui tak a ni tih min hriat nawn tir se, tiin a sawi.
ATC chu Mizorama Pathian thu zirna kan neih hlu tak a ni, tiin, rilru dik leh thinlung dik nei tura inzirna hmun ni zel se, ram tana zirna in hlu tak ni zel turin a duhsak tih K Sapdanga hian sawiin, “Pathian thu leh India danpui hi thil kalkawp tha tak a ni a, rinna leh ram hmangaihna hi thil inzawm nghet tak ti pawhin kan sawi thei ang. Rinna leh ram hmangaihna hian tum thuhmun a nei a: thu tak, midang tana inpek leh midang hmangaih turin min beisei tlat a. Kan danpui hian mi zawng zawng thleibik a nei loa, mi zawng zawng a huap vek a, mirethei, chaklo leh tanpui ngaite an dikna humhim sak hi a tum lian tak a ni,” a ti.
Hruaitu tha leh khua leh tui huaisen, India danpui ngaipawimawh mi kan mamawh niin a sawi a. Republic Day hian zalenna, inpumkhatna leh dikna min neih thar tir se tih a sawi a ni.