Atlantic inkar kaiin record siam

Atlantic inkar kaiin record siam
Lagos, Portugal lawng chawlhna atanga South America-a Cayenne, French Guiana lawng chawlhna chu 3,794 nautical miles (km 7,026) a hla a ni a, a inkarah hian boruak inthlak thut tawn tur a tam a, thlipui leh ni sa rum rut mai te, thuifawn sang tak tak te paltlang a ngai. Europe atanga South America thlenga Atlantic tuipuia inkar kai chu thil awlai a ni dawn lo nasa!
Mahse, sap nula kum 21 mi, Zara Lachlan chuan a lawngleng, feet 24 a sei hmangin, amah chauhin Atlantic tuipui hi paltlangin, hmeichhe zinga Atlantic tuipui paltlanga Europe atanga South America inkar kai thei hmasa ber a ni ta a ni.
He tuipui paltlang tur hian hun pawh a hmang rei, Zara hi October ni 27, 2024 khan Lagos, Portugal atangin a inkar chhuak a, thla li dawn a thang hnuah hmeichhe zinga Atlantic tuipui paltlanga Europe atanga South America inkar kai thei hmasa ber a nih bakah, hetiang ti thei naupang ber a ni a, chubakah hmeichhe zinga eng tuipui pawh tuipui (any ocean) mahni chauha inkar kai thei naupang ber a ni bawk.
Zara hi a zinkawngah hian tuman an pui lo va, a himna tur ngaihtuahpuia a zinkawngah lawng danga zuitu pawh a nei lo a, amah ngawtin a zin kawng hi a paltlang a, tuipuia lawnglenga a inkar rei zawng hi ni 97 leh darkar 10 leh minute 20 niin, hetih chhung hian nitin darkar 17 vel inkar ziah ang a ni.
Zara hi US a piang, UK a seilian niin, physics student a ni a, Loughborough University-a a zirlaiin tuipui a lawnga inkar chhuah chakna a nei ta a ni. Zara chuan, “A nuam phianin ka ring a. Kan that deuh laia thil thar a tam thei ang ber han tawn leh zir chakna ka nei a ni,” a ti.
August 2024 hmalamah tuipuiah vawi khatmah lawngin a la inkar chhuak ngai a, khawpui a cheng a ni bawka tuipuia sangnga chetla pawh la hmu ngai lo a ni. Nula hleitling zeih zawih tak, feet 5 leh inches 10 a sang a ni a, ama rihna mai bakah a ei leh in tur leh a mamawh dang te nena a thil pai ngai zawng zawng chu kg 800 vel lai a rit a ni bawk a, Atlantic tuipuia a inkarkai meuh chuan a rihna pawh hmun thuma thena hmun khat vel a paih ngei dawnin a hria a, a thil tum puitlin tur hian thla thum chhung England khawchhak lama luiah training a nei ngat ngat mai a ni.
Zara hi vanneihthlak takin Women in Sport and Team Forces ten an sponsor hlauh a, chuti ni lo se mahni sum seng chuan a hautak lutuk dawn niin a sawi a, “Lawng leina bakah ka mamawh tur zawng zawng nen chuan mahni sum seng chuan tihngaihna a awm lo,” a ti.
A chhungte pawhin an phurpui niin a sawi a, “Min phurpui viau nain, min hlauhthawn pui bawk a. Ka thil tum ka hrilh chuan ka nu chu a tap hial a, ka pa chuan ka tih tak tak pawh a ring chiah lo a, sum sen tur a tam tham si a,” a ti.
Sponsorship te a rin aiin a hmu rang a, nikum July ni 2 khan thutlukna a siam fel a, August ni 1 atangin training a tan a, October ni 27-ah a inkar chhuak tan ta a ni. A tirah chuan ni 60 chhung vela a zin kawng zawh chhuah theih a inbeisei a, “Mahse, kar khat ka inkar hnuah ni 60-ah chuan ka zo hman dawn lo nasa tih ka inhre nghal,” a ti.
A diary-a a ziah dan chuan an tuipui a hun hman hmasalam ni 39 a ni 35 chhung chu beidawn thlak rum ruma hun khirh niin a tarlang a, boruak tha tak hnuaia thawk chhuak tura inngai chuan a zin kawng a zawh tan lamah harsatna a tawk nghal mawlh mawlh a, “Darkar 20 inkar pawha mel 11 lek kal te chu beidawng duh ila chuan beidawn pui tham tur chu a ni,” a ti.
Tuipuia a inkar chhung hian nitin darkar 17 tal chu a inkar ziah a, darkar 4 aia rei a mu ngai meuh lo. A tihdang tlangpuiah chuan zanlai atanga inkarin, zing dar 3:00 vel thleng a inkar a, chumi hnuah darkar thum vel a chawl a, zing dar 6 atanga inkar lehin, chhun dar 12:00 vel thleng inkar lehin, minute 90 vel a mu chawl a, zan dar 9 thleng a inkar leh hnuah, chawlin, zanlai atangin a che chhuak leh thin.
A ni 40-naah a lawng a chesual a, a phone a chhe zui a, ni 57 chhung midang be pawp thei lovin a awm ta vang vang mai a ni. Zara chuan, “Thla hnih chhung chu a reh duh tlawk tlawk khawp mai. Chutah ka mu tlem bawk nen nitin hian thil hmuh sual hi nei deuh ziah. Mahse, ka hmuhsual te hi a hlimawm lam a ni tlangpui a, a tihzia khawp mai,” a ti.
Zan khat chu lawng lianin a hmuh loh avangin a su teuh ther ther hle a, a ke a tihpem a thisen chhuak rim a hriata shark-in minute 45 vel zet a hel kual zak zak mai te chu a thil tawn hlauhawm zingah a tel bawk.
Zara chuan, “Hetia tuipuia ka zin chhuah hma hian tuipuia nungcha te chetla hi a takah ka la hmu ngai lo a, ka han hmu thei ta chu a nuamin a ropui ka ti. Sangha chi hrang tam tak ka hmu a, whale pawh a chi hrang a tam, dolphin-te pawh ka hmu a, dolphin hi tui te pawh ka hleuh pui. A awm tih pawh ka hriat loh thil tam tak ka hmuin ka tawng a, ropui tak a ni,” a ti.
South America a hnaih ta a, mahse, a phone chhiat avanga ni 50 vel zet tumah a biakpawh theih tawh loh avangin a thlen chin pawh a chiang fak thei tawh lo a, a lawngin Cayenne, French Guiana, South America tuipui kam a thlen chuan khawmual a thleng ta chu a ringhlel lek lek zawk hial a ni.
Zara chuan, “Hetiang hi midang pakhat chiahin a la ti thei a, chu pawh ka pian ve hma daih tawh khan a ni a, ani chuan kei aiin darkar 18-in hun a hmang tlem zawk a, nikhat pawh tling lovin ka pha lo tih ka hriat chuan ka lunghnur ve khawp mai,” a ti.