Atletico Madrid in Barcelona an sawp

Ningani zan khan Spanish Cope del Rey semi-final thawhkhatna khelh a ni a. Atletico Madrid chuan champion lai FC Barcelona chu 4-0 ngawtin an sawp a, final an hnaih nghal hle. Barcelona hian an trophy kawl mek humhim tura final lut turin an mualah hnehna lian an chan a ngai dawn. Atletico Madrid hian La Liga lama an ngam loh thin FC Barcelona lakah bul an tan tha viau a, hnehna lian chang turin an vannei tel ve bawk. Madrid club lian hian ngam takin an mikhualte an nawr a, inkhel tan atanga minute hnih hnu lekah goal thun theihna hun remchang an hmu nghal. Barcelona si nghak Joan Garcia chuan pui zetin a save a, an team a chhanhim phawt. Bul tan tha viau mah se Garcia hi a che nawi zui tlat thung a, ho taka back-pass a dan per vangin minute rukna lekah goal an chhuah nghal der.
Hma takah goal an thun vangin Atletico Madrid an phur a, ngam leh zualin leh zualin an khingpuite an nawr chhunzawm. Minute 13-na lekah fuh takin an khingpuite an nawr tlang zui leh a. Antoine Griezmann chuan leihrulah mawi takin a pet kual lut a, minute 14-naah an goal hnihna a thun. Minute 14 chhung leka goal hnih an chhuah vangin insiamthat mamawh viau mah se Barcelona an insiamtha thei chuang lova, an talbuai chhunzawm zel.
An khingpuite talbuai lai chuhin Atletico Madrid in goal tam zawk thun tumin tan an khawh a, an mikhualte an nawr na zui hle. Na taka an khingpuite an nawr rah an seng a, chawlhlawk hmain goal hnih an thun belh leh hman. Si hnih phur tawh Barca in goal thun tumin tan an khawh a, goal thun theihna hun tha nei bawk mah se goal bar an tih per a, an huntha an chhawr tangkai thei lo thung.
Ngam taka an khingpuite nawrtu Atletico Madrid in uiawm taka an hun tha a neih an hlah hnuin Barcelona tlarhnung an thiat darh nawn leh a, goal an thun belh leh ta nge nge. Chiang taka Barcelona tlarhnung an thiah hnuin Ademola Lookman chuan awlsam takin minute 33-naah an goal thumna a thun a, an hmahruaina a tizau leh zual.
Si thum ngawt phurin, goal thun mamawh viau mah se Barcelona in a tawp an khar tha thei chuang lova, uiawm takin an hun tha neih an hlah zawn. Barcelona lamin an hun tha neih an hlah zel laiin Atletico Madrid lamain an hun tha neih hmasak an chhawr tangkai leh tlat thung. Fuh taka Barca tlarhnung an kat kual hnuin Julian Alvarez chuan tha zetin a pet goal a, minute 45’+2-ah an goal lina a thun a. Atletico Madrid hian 4-0 ngawta hmahruai chungin chawlhlawk an hmang.
Chawlhlawk hnu lamah inkhel hmuhnawm zui bawk mah se goal a luh belh thei tawh lo. Barcelona si nghak Garcia a che chhe chhunzawm thung a, goal li ngawt a chhuah hnuin Garcia hi minute 85-naah hnawhchhuah a ni.
Semi-final thawh hnihna hi March ni 3 zanah khelh a ni dawn a. Champion lai Barcelona hian final lut turin inlehthalna lian thlen tir an mamawh.