Aug.1 atangin intlanchhawk dan tharTraffic tibuai thei veng tur awm dawn

Aizawl khawpui chhungah lirthei intlanchhawk dan thar ruahman a ni a, khawpui kawngdung bikah chauh a ni tawh ang. Traffic kaltluang pangngai tibuai thintute veng turin khauh taka kal tur Enforcement Squad an duty dawn.

Senior SP Traffic Aizawl Ruatsanga Ralte sawi danin, Unified Transport Co-ordination Committee on Traffic Management chuan Aizawla lirthei intlanchhawk dan chu tih danglam deuh tawh tula a hriat vangin Coordination Committee on Traffic Management (CCTM) ah rawtna a thehlut a. CCTM hian hei hi ngaihtuahin, intlanchhawkna hi AMC huam chin pumpui ni tawh loin, Bawngkawn leh Kulikawn inkar via Chaltlang/ Ramhlun leh Sikulpuikawn atanga Vaivakawn via Temple Square-ah chauh kalpui tura enchhin a rel a, tuna intlanchhawk dan tur hi duan a ni ta tih a sawi.
Tuna intlanchhawkin a huam loh tur zingah hian Bawngkawn-a Zosangliana Point hman a ni dawn a. He point hnunglam (via Durtlang/ Zemabawk) tan Bawngkawn – Sairang emaw Bawngkawn – Ramhlun emaw chuanhnuai, chutiangin hemi letling zawng pawha kal duh tan kal theih ni dawn tih Traffic SP hian a sawi.
“Kan ruahnanna siam hi mipui tana harsatna siam tam lo thei ang berin duan a ni,” a ti.
Traffic Police zirchiannaah, tunah hian Aizawl khawpuia service taxi (LMV leh two wheeler) 3500 chuang an awm a, LMV taxi stand 84 leh two wheeler taxi stand 56 awmin, stand-ah hian LMV ah 457 leh two wheeler ah 750 an ding thei. Taxi-te hian intlanchhawk ruahmanah an din ni titlem turin thuneitute an ngen a, tuna ruahman tharah hian A-B-C-D a then an ni anga, kar khatah, vai tlan ni neih theih sa bak ni khat chauh an ding dawn.
Intlanchhawk hman thar turah hian nitin taxi (LMV leh two wheeler) service 800- 900 inkar velin a pun phah tura chhut a ni tih Traffic SP hian sawiin, stand-ah an leng dawn lo hle a, traffic ti tawt phah tham an ni dawn tih a sawi.
Nitin Aizawl khawpuiah hian lirthei sing 5-6 inkar chevel reng anga chhut a ni a. AMC nen tangdunin, khawpui chhunga traffic kaltluang lai tibuai thei chi vengtu tur Enforcement Squad an din chuan nitin khawpui an vil dawn tih a sawi. “Traffic dan bawhchhe lo turin mipui kan ngen a. Man ngai loa discipline tha tak vawng turin kan ngen a ni,” a ti.

8 Intlanchhawk dan tharah hian lirthei zawng zawng (mimal, sawrkar, bungraw phur lirthei leh district dang lirthei leh state pawna lirthei register pawh huamin) zing dar 9.30 atanga tlai dar 6.00thleng a huam ang. Lirthei intlanchhawk hian Inrinni, Pathianni leh sawrkar holiday a huam lo.
8 Bawngkawn leh Kulikawn inkar main road: Chaltlang leh Ramhlun peng, Bawngkawn atanga Kulikawn (Ngaizel, Tlangnuam leh Pika Road peng thleng) inkar via Chaltlang/ Ramhlun (Laldenga Road) Chanmari – Lower & Upper Zarkawt Dawrpui – Upper Khatla – Sikulpuikawn – Kulikawn chin a huam.
8 Sikulpuikawn leh Khatla inkar: Sikulpuikawn atanga MINECO peng (Marova Point) 23 Sector AR gate bul thleng via Peter Street Khatla leh, Khatla leh Vaivakawn inkar: Khatla Kawn atanga Vaivakawn Taxi Stand, Bazar Bungkawn peng thleng via Temple Square a huam a ni. Bawngkawn lamah Chaltlang/ Ramhlun hnaih Zosangliana Point thleng.