Australia an chak nuamsa
Asian Cup khelh mek chu Pathianni zan khan last 16 khelh chhunzawm a ni a, champion tura rinkai Australia chuan awlsam takin Indonesia an hneh a, quarter-final an lut. Pathianni zana inkhel dangah Tajikistan chuan harsa takin United Arab Emirates an hneh a, quarter-final an lut ve bawk.
Champion tura rinkai ber zinga mi Australia hian Jassim Bin Hamad Stadium, Doha-ah Indonesia an hmachhawn a, si li fai ngawtin hnehna an chang. Indonesia hian team lian lakah bul an tan tha lo va, minute 12-na lekah Elkan Baggott chuan an lamah a ti-goal a, Australia hmahruaina goal a thunsak. He goal hian chak tura rinkai zawk Australia a fuih phur a, inrintawkna sang zawk nen an inlan zui theih phah. Own-goal hmanga hma an hruai hnuin Australia tan hian Martin Boyle chuan minute 45-naah an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Australia an khel tha chhunzawm a, goal erawh an thun belh thei bik mai lo thung. Hun rei tak goal an thun theih loh hnuin Craig Goodwin chuan minute 89-naah an goal thumna thunin an hmahruaina a tizau a. Goodwin goal thun atanga minute hnih hnu lekah Harry Souttar chuan an goal lina a thun belh leh cheu a, si li faiin hnehna an chang zui ta a ni.
Awlsam taka Australia an chak laiin Pathianni zana inkhel dangah Tajikistan chuan harsa takin UAE an paltlang a, quarter-final an lut ve bawk.
Ahmad bin Ali Stadium-ah Tajikistan in bul an tan tha a, goal thun hmasa zawkah an tang. Minute 30-naah Vahdat Hanonov chuan hmahruaina goal a thun a, he goal hi an chakpui teuh hle. Hun rei tak an si phurh an sut theih loh hnuin hun pek belhah UAE an che fuh ta nge nge a, minute 90+5-ah Khalifa Al-Hammadi chuan goal pawimawh tak thunin an si phurh a sut. Hun pangngai leh extratime minute 30 chhungin goal thun belh an awm thei lova, tie-break hmangin quarter-final lut tur zawk zawn chhunzawm a ni.
Penalty shootout ah hian Tajikistan tana pettu mi pangain an pet goal vek laiin UAE tan a vawihnihnaa pet Caio Canedo chuan a thelh tlat thung a, Tajikistan in 5-3 a hnehna changin quarter-final an luh theih phah ta a ni.