Australian Open 2024 an \an ta

Kum khat chhunga Grand Slam tournament hmasaber Australian Open 2024 chu a vawikhatna atan Pathianniah an khel tan a, nimin Melbourne Park-a hmeichhe singles result thenkhat kan hrutkual dawn a ni.
Belarusian Aryna Sabalenka pawhin a title kawl laia humhim tura a chetchhuah-naah nimin vek khan hnehnain bul a tan a, German qualifier Ella Seidel lakah minute 53 lek chhungin 6-0 6-1 hnehna nuamsa a chang a, 2023 Australian Open trophy bak Grand Slam singles title la hlawhchhuak ve lo world number two hian Melbourne-ah a major title pahnihna tur a beisei leh mek.
Kum khat chhunga a vawikhatna atan Greek eighth seed Maria Sakkari chuan Grand Slam match-ah hnehna a chang.
Kum 28 mi hi nikum French Open, Wimbledon leh US Open-ah khan first round a paltlang zo lo vek a, Melbourne-a a bultannaah erawh minute 71 lek chhungin Japanese Nao Hibino lakah lakah 6-4 6-1 hnehna a chang a, major tournament-a second round harsatna a tawh tlat a paltlang ta phawt.
A Grand Slam match hnuhnung pathuma a tlawm vek hnua hnehna boruak hip leh thei ta Greek nula chuan Rod Laver Arena-a hnehna a chan hnuah rilru lama inkhel harsa tak a nih thu sawi chungin hnehna a chan avangin a hlim hle tih a sawi.
Second round lama Russian Elina Avanesyan hmachhawn leh tur Sakkari hian Melbourne-ah result ropui a la sualchhuak lo a, a thlensan ber chu third round a ni a, kumin erawh a changkang deuh dawn a ni mai thei a, tun hi kum 2021 hnu lama kum khata a match hmasa palia a chak vek vawikhatna a ni.
Danish wildcard leh 2018 Australian Open champion ni bawk Caroline Wozniacki pawh second round lut zingah telin, ani phei hi chuan nuamsa lehzualin first round a paltlang a, Polish 20th seed Magda Linette laka 6-2 2-0-a hma a hruai laiin a tumpui hian a ke a tina hlauh a, a khelh chhunzawm theih tak loh avangin Denmark player hian hahdam zawkin first round a paltlang.
World number one hlui Wozniacki hian nikum mai khan tennis a chawlhsanna atangin khelmualah a kirleh a, chumi hnuah tun hi Melbourne Grand Slam a khelh leh vawikhatna a ni.
Pathianni inkhel dangah 2019 French Open semi-finalist American Amanda Anisimova pawhin 6-3 6-4-in 13th seed Liudmila Samsonova a hneh a, rilru lama harsatna a tawh avanga thla sarih zet a chawlh hnuah tun hi Grand Slam tournament-a a tel leh vawikhatna a ni.
Czech Republic tleirawl kum 17 mi Brenda Fruhvirtova chu kum 2020-a hming rawn chher American Coco Gauff hnu lama hmeichhe zinga Australian Open main-draw singles match hnehna chang leh thei naupangber niin, Romanian Ana Bogdan laka 2-6 6-4 6-3 hnehna a sualchhuah hnuah defending champion Sabalenka a su zui leh ang.
France player rothap Alize Cornet erawh first round paltlang zo lo langsar hmasa niin, qualifier Maria Timofeeva lakah 6-2 6-4-in a tlawm a; Czech ninth seed Barbora Krejcikova chuan set khatna hloh zet chungin Japanese Mai Hontama lakah 2-6 6-4 6-3 hnehna a chang hram a, French Open champion hlui hian a nikhatnaa Briton Jodie Burrage hnehtu Germany player Tamara Korpatsch lakah fiahna dang a hmachhawn zui leh ang.
Lasi thawnthu ang maia 2021 US Open final rawn thleng nawlh Leylah Fernandez pawh first round paltlang zingah telin, John Cain Arena inkhelah Canadian 32nd seed hian Czech qualifier Sara Bejlek chu 7-6(5), 6-2-in a hneh.
British number two Jodie Burrage chuan harsatna lian tawk loin set hmasaber la bawk mah se a Australian Open main-draw debut-ah 2-6 6-3 6-0-in Germany player Tamara Korpatsch a hneh lo.